Ukraina qırımlılar içün vesiqalarnı aluv sadeleştirilgen ceryanını azırlay

20 Dekabr 2022

Foto: bykvu.com

Ukrainada vaqtınca işğal etilgen Qırımnıñ sakinleri içün doğma ve ölüm şeadetnamelerini aluv sadeleştirilgen ceryanı azırlana.

Ukraina prezidentiniñ Qırım Muhtar Cumhuriyetindeki daimiy vekiliniñ muavini Denıs Çıstikov bunı bildirdi, dep Hromadske radio yazdı.

O qayd etti ki, Ukraina qanunlarına mücibi, 2014 senesi Ukraina vatandaşları olğan, vaqtınca işğal etilgen Qırımnıñ sakinleri, Ukraina vatandaşları da qalalar. Ve bütün medeniy dünyanen beraber Ukraina olarnı Ukraina vatandaşları olaraq tanıy.

– Olarnıñ böyle degen rus pasportlarını almağa mecbur qalmaları – tibbiy hızmetler ve Qırımnnıñ topraqlarında yaşama imkânını almaq içün mecburiy bir adımdır. Bu, zornen pasportlaştıruv edi. Rusiye, topraqlarnı işğal eter etmez, sakinlerini de almağa ıntıldı. Bu, zapt etkenleri topraqlarğa dair müstemlekeci siyasetidir, – dep Çıstikov bildirdi.

Bundan ğayrı, rus pasportları, siyasiy davalar içün de zornen berildi. Çünki ukrain taraflı olğan Ukraina vatandaşlarına üküm çıqarğan soñ Rusiye olarnı Ukraina vatandaşları olaraq tanımadı ve deñişme cedvellerine kirsetmege istemedi.

Denıs Çıstikovnıñ qayd etkenine köre, soñ 8 senedir vesiqalarnı verifikatsiya ceryanı keçire.

O hatırlattı ki, tolu miqyaslı tecavuzdan evel Qırımnıñ sakinleriniñ Herson vilâyetinde, DMHniñ ve VAAQOnıñ bölgelerinde ukrain vesiqalarını almaq imkânı bar edi. Fevral ayınıñ 24-ünden soñ bu daa zor bir ceryan oldı, amma böyle bir imkân bar.