Taziye

17 Noyabr 2017

Fevzi ağa Şevqiyevniñ vefatınen bağlı taziye.

Noyabr 16 künü Aqmescitte Fevzi ağa Şevkiyev vefat etti. 

Fevzi ağa 1926 senesinde Qırım ASSR, Bağçasaray rayonı, Stilâ köyünde dünyağa keldi.

1937 senesi Fevzi ağa daa 11 yaşında olğanda, onıñ babası Osman Şevqi SSSR-niñ NKVD organları tarafından apis etildi ve “kontrrevolütsion” areketlerinen qabaatlanıp, ölüm cezasına mahküm etildi. Anası ise, Emine Şevqi dört kiçik balanen yalıñız qaldı. Bu vaqıttan başlap aile reisiniñ ağır yükü, qardaşlarnıñ eñ büyügi olğan 11 yaşındaki Fevziniñ omuzlarına yüklendi.

Qırımnıñ almanlar işğali yıllarında Şevqiyevlerniñ qorantası topyekün partizan bölükleriniñ erkânında bulundı. Fevzi ağa – Qırımdaki partizan areketiniñ veteranıdır. 18 mayıs 1944 senesi Şevqiyevler qorantası, bütün qırımtatar halqı kibi Qırımdan sürgün etildi. Şevqiyevlerni başta Özbekistannıñ Gallâaral rayonında yerleştirdiler. Soñradan Fevzi Şevqiyev aydavcı zenaatını menimsep ve aydavcı vesiqasını alıp, qorantasınen Samarkand şeerine köçti.

Fevzi ağa mesüliyetli ve dürüst olıp, semetdeşleri ve işdeşleri arasında müteber ve sayuvlı insan olaraq biline edi. Fevzi ağa qırımtatar milliy areketniñ faal iştirakçisi olıp, öz vaqıtında, qırımtatar halqını sürgün yerlerinde temelli olaraq qaldırmağa istegen Sovet akimiyetiniñ siyasetine qol tutmağa red etken edi. O, hususan, “on yedilerniñ mektübi” degen vesiqanıñ müellifleri tarafından qırımtatar halqnıñ sürgünlikteki güyâ bahtlı yaşayışını maqtağan mektüpke öz qolunı qoyma teklifine razı olmağan edi.

1990 senesinde Fevzi ağa kiçik oğlusınıñ qorantasınen beraber Qırımğa qayttı. Qısqa vaqıtta o, Bağçasaraynıñ Stilâ köy sakinleri keçirgen ananeviy köydeşler körüşüvlerniñ teşkilâtçısı oldı.

Fevzi ağanıñ Velâde hanım ile ğayet bahtlı aile yaşayışı 65 yıl devam etti. O, üç evlâtnı östürip terbiye etti ve doquz torun ile sekiz torunçeniñ sevgisi ve sayğısı müitinde yaşadı.

Qırımtatar Milliy Meclisniñ azası Riza Şevqiyevge, babası Fevzi ağanıñ vefatı munasebetinen teren taziyelerimizni bildiremiz.

Merhum Fevzi ağanıñ qorantası, aqrabaları ve yaqınları ile bütün halqımıznen beraber bu accı yanıqnı paylaşamız. Fevzi ağanıñ hatırası ebediyen yüreklerimizde qalacaq!

Allah rahmet eylesin.

Qırımtatar Milliy Meclisi, 

Kyiv, 17 noyabr 2017 s.