Siyasiy mabüs Seydametovniñ acelen ameliyatqa ihtiyacı bar

07 Noyabr 2023

“Hizb ut-Tahrir davası”nıñ azası ve siyasiy mabüs Lenur Seydametovnıñ acelen tibbiy yardımğa ihtiyacı bar – apishanede onıñ tiz buğumında Beyker kistasını taptılar. 

İçtimaiy birleşme “Qırım birdemligi”niñ birdirgenine köre, onıñ belkemiginiñ aşağı bölügini ameliyat etmek kerek.

Rusiye tarafından maküm etilgen Qırım sakininiñ apayı añlattı ki, Seydametov bir buçuq aydır hastahanege yatqızınmasını beklegen. Adamnı baqqan cerrah, ameliyatnıñ kerekligini tasdıqladı.

Bildirildi ki, Seydametov bir qulağınıñ eşitmegenine de şikâyet ete.

Rus makemesiniñ üküminiñ şikâyet arizası baqılğan soñ 2023 senesi qara qış ayınıñ 10-unda qırımtatar adamını Novoçerkasktaki SİZOdan Lupetsk vilâyetiniñ Yelets şeerindeki apishanege etap ettiler.