Siyasiy mabüs Abdulmecit Seitumerovğa kamerada Quran tutmağa yasaqladılar

20 Noyabr 2023

Hizb ut-Tahrirniñ “beşinci Bağçasaray gruppası”nıñ iştirakçisi Abdulmecit Seitumerovğa kamerada arap tilinde Quran tutmağa yasaq ettiler. “Qırım birdemligi” içtimaiy birleşme bu aqqında haber berdi.

Advokat Emil Kurbedinovnıñ sözlerine köre, Qırım sakini 2. SİZOnıñ memuriyetine ariza berip, qararını bekley.

«Arap tilinde Qurannen bağlı belli meseleler bar – bazı vaqıtlarda onı bereler, bazı vaqıtlarda ise bermeyler. Arap tilinde oqumaq ya da tek rusça tercimesini oqumaq mümkün olıp olmağanımnen bağlı sualler peyda oldı», – uquqçı bildirdi, dep Qırım.Aqiqat haber berdi.

Abdulmecit Seytumerov tutuv şaraitine şikâyet etmedi. İmayecisine oña kelgen er şeyni ala ve makeme ceryanına azırlana.

«Küreşmege ve bu saçma davada qabaatsız olğanını isbatlamağa niyetlene», – dep Kurbedinov qoştı.

Orman ayınıñ 24-ünde saba maalinde Qırımnıñ Bağçasaray şeerinde ve Bağçasaray rayonında rus quvetçileri qırımtatalarnıñ – Ruslan Asanov, Seydamet Mustafayev, Remzi Nimetulayev,  Abdulmecit Seytumerov, Amethan Umerov ve Eldar Yakubovnıñ – evlerini tinttiler. Bundan soñ oları tuttılar ve Aqmescitteki RF FSB binasına alıp kettiler. Tutulğanlarğa RF CQniñ 205.5. maddesiniñ birinci qısmında şübe bildirdiler – terrorcı faaliyetni teşkil etüv ve bu tür teşkilâtnıñ faaliyetinde iştirak etüv. Rusiyede yasaqlanğan Hizb ut-Tahrir teşkilâtı aqqında laf etemiz.