Şimdi işğalcilerniñ Qırımda ne telükesizlik bazası, ne logistika yolu bar — Zelenskıy

24 Oktâbr 2023

Rusiye bir hayal tüşünip çıqardı ki, onıñ Qara deñizde başlığı sanki yeñilmez, Qırım ise boysundı, amma şu anda hayaller yoq ola. RF Qaradeñiz flotu, Qara deñizniñ ğarbiy qısmmında operatsiya yapamaz.

Qırım platforması parlament sammitiniñ ekinci sammiti vaqtında Ukraina prezidenti Volodımır Zelenskıy bunı bildirdi.

“Şimdi rus terrorcılarınıñ Qırımda ne telükesizlik bazası, ne logistika yolu bar”, — dep ayttı o.

Zelenskıy qayd etti ki, Ukraina Qırım ve ertaftaki suvlar üzerinde tolu ateş kontrolına alâ daa azır degil, amma “bu, vaqıt meselesidir”.

“Men samimiy olurım, dünyadakilerniñ çoqusı içün Qırım, bizim toprağımıznıñ tolu işğali olmaz dep añlatqan bir delil edi. Qara deñizde rus kontrolı ve işğalciniñ flotunıñ mevcut olması, Rusiyeniñ Qara deñizde başlığı sanki yeñilmez dep bir hayal köstergen edi”, —dep Ukraina prezidenti qayd etti.

Onıñ sözlerine köre, bellemek mümkün edi ki, tüzlerce biñ RF vatandaşınıñ yarımadada yerleşmesi ve işğalcilerniñ bütün serbestlik ve itirazlıqlarğa qarşı kütleviy repressiyaları vastasınen Qırım sanki boysunğan olaraq körüne edi.

“Şimdi ise bu hayaller yoq ola. Men sadece bizim neticelerimizni hatırlatam. Birincisi — rus arbiy flotu, Qara deñizniñ ğarbiy qısmında operatsiya yapamaz ve yavaş-yavaş Qırımda qaça. Ve bu, tarihiy bir muvafaqiyettir”, — dep ukrain lideri ayttı.

Prezident qoştı ki, Ukraina, bir çoq ülkede cian aşayt istiqrarınıñ bağlı olğanı telükesizlik qırmızı qan damarı rolüni Qara deñizge keri qaytarmağa becerdi.

“Qara deñizde yañı ihrac koridorı çalışmağa başlağan soñ deyerli 50 gemi yük almaq içün kirdi, daa 50 gemi kirer”, — dep ayttı o.

Bundan ğayrı, ukrain lideri haber berdi ki, Qırım sakinleri, Rusiyeniñ o yerden ketecegini añlaylar ve Ukrainanı bekleyler. Ukrainanıñ yarımadada çoq ittifaqdaşı bar.

“Bizim maqsadımız, ukrain topraqlarını işğalden tamamınen azat etmektir. Qırımnen beraber. Biz bunı yerine ketirmelimiz”, — dep Ukraina devletiniñ başı ayttı.