rusiye taqiqat eyyetine ketmegeni içün qırımtatar qadınını hırsızlamağa qorquttılar

07 Sentâbr 2023

Telefon ektende özüni rf FSB işçisi adlandırğan tanınmağan adam, Qırım sakini olğan Emine Zekeryayevanı hırsızlamağa qorquttı. Advokat Emil Kurbedinovğa atıf eterek, Qırım.Aqiqat bu aqqında haber berdi.

Bildirmege köre, berim ayınıñ 5-inde Zekeryayevağa tanınmağan adam telefon etip, Canköydeki RF Taqiqat eyyetiniñ idaresine ketmesini talap etti. O, bunı eki kere yaptı ve öz adı ve soyadını aytmağa red etti. Aynı zamanda qayd etti ki, onıñ evi tintilgende mevcut edi. Oña vesiqa resmen yollamasını ve taqiqatçılarğa advokatnen beraber kelmege istegenini aytqanda tanınmağan adam onı qorqutmağa başladı.

“O zaman başqa usullarnı qullanırmız. Kelirmiz ve sizni alırmız”, – dep advokat Emil Kurbedinov telefon etken insannıñ sözlerini tsitata etti.

Kurbedinovnıñ qayd etkenine köre bu tür areketler, rusiye qanunlarınıñ bozulmasıdır ve RF FSBğa ariza yolladı. Bundan ğayrı advokat, işçileriniñ bu insannıñ areketleri cinaiy ya da memuriy tarzda qanunlarnı bozıp bozmağanını ögrenmelerini talap etti.

Arman ayınıñ 7-sinde saba maalinde belli oldı ki, Eski Qırımda 30 yaşındaki qırımtatar Asan Zekeryayevnıñ evini tinttiler. Bundan soñ adamnı belli olmağan yerge ketirdiler. Birazdan ögrenildi ki, Zekeryayevniñ ailesini Eski Qırımğa ketirdiler – onıñ yaşağanları yerni yañıdan tinttiler. Silânen insanlar evini qırşavladılar.

Tintüvden soñ tutulğan Asan Zekeryayevnı ayapı Emine Zekeryayevanen beraber Aqmescitke ketirdiler.