Rus apishanesinde qırım siyasiy mabüsleri Nagayev ve Umerovğa er vaqıt domuz etini bereler

21 Dekabr 2023

13 ve 18 senege maküm etilgen ve RF Çelâbinsk vilâyetiniñ Verhnöuralsk şeerindeki apishanede qırımtatar Ruslan Nagayev ve Şaban Umerovğa er vaqıt domuz etini bereler. İslâmda onı aşamaq yasaqtır.

“Qırım birdemligi”ne tefsir etkende siyasiy mabüslerni ziyaret etken advokatlarğa atıf eterek olarnıñ apayları Zarema Umerova ve Zarema Nagayeva bunı añlattı.

“Olarnıñ aşı balanslı degil. Aşta sıq domuz eti bar. Musulman olaraq Ruslan onı aşamay”, – dep Nagayeva qayd etti.

O qoştı ki, siyasiy mabüsniñ sağlığı alı zayıflaşqanı içün cerrahtan mesleat almağa ihtiyacı bar. Oña mesleat bermege ve diagnoz qoymağa red eteler, amma ilâçlarnı berdiler.

Aynı zamanda Umerovnı etap etken soñ ŞİZOğa oturttılar, çünki sanki “yañlış vaqıtta” yuqlap qalğan. Adamnıñ sağlığınen meseleler bar – yüksek basımını çeke. Bu sebibinden muntazam tarzda ilâç almalı.