Qırımtatarlar Qırımdaki mobilizatsiya noqtalarına mecburen ketirileler – Qırım ğayesi

23 Sentâbr 2022

İşğal etilgen Qırımda qırımtatarlarnıñ kompaktlı yaşağanları yerlerde rus quvetçileri sakinlerni rfnıñ ordusına kirsetmek içün olarnı mobilizatsiya noqtalarına alıp ketireler. ‘Qırım ğayesi’ cemiyet teşebbüsinde bu aqqında haber berildi.

Uquq qorçalayıcılarnıñ bilgilerine köre, kompaktlı yaşağanları yerlerden mecburen mobilizasiya etilgen qırımtatarlarnıñ sayısı ya biñge yaqınlaşa, ya da endi biñden ziyade ola.

Qayd etile ki, sentâbr ayınıñ 22-sinde saat 6’da bu operatsiya başladı ve qırımtatarlarnıñ kompaktlı yaşağanları deyerli bütün yerlerde – Bağçasaraynıñ 6. ve 7. rayonları, Aqmescit rayonındaki Mamaq köyü, Dobrovolsk vadiyiniñ köyleri, Sarı-Suv massivi, Saq, Azovskoye, İslâm Terek, Zuyada keçirile.

Cemiyet teşebbüsi bildirdi ki, politsiya hadimleri reydlerde iştirak eteler, meskün yerlerge kirişte rus gvardiyacılarınen Qırım YPH öz noqtalarını tikledi.

– Bazı evlerge yalan vastasınen kire ediler – yardımğa ihtiyac olğanlarını bağıra ediler, insanlar ise qapılarnı açqanda mobilizatsiya malümatnamesini bere ediler. İş yerleriden mobilizatsiya vaqiaları da belli – Zuyada bir qaç erkek oca, Bağçasarayda – tibbiy hadimler mobilizatsiya malümatnamesini aldılar. Em de mobilizatsiya malümatnamesiniñ berilmesinden soñ kişiniñ avtobusqa mindirilip arbiy komissarlıqqa ketirilmesinen bağlı çoq vaqia qayd etildi, – dep haberdar etile.

‘Qırım ğayesi’ qayd etti ki, işğal etilgen topraqlarnıñ sakinleriniñ tecavuzı bir devletniñ ordusına mobilizatsiyası cenk bir cinayeti ve ‘cinayetniñ qurbanı yañıdan Qırımnıñ tamır halqı’nıñ olğanını köstere.

– Qırımtatalarnıñ mobilizatsiyasına fokus, tamır halqınıñ genotsid şekillerinden biri ola bilir, – dep teşebbüsniñ vekilleri bildirdiler.