Qırımtatar Milliy Meclisiniñ Prezidiumınıñ İlânı

07 Iyün 2023

Dünya añlamalı ki, eger rusiyeni bugün toqtamasaq, insaniyet içün yarın kelmeye bilir.

2023 senesi bozarğan aynıñ 5-inden 6-sına gece maalinde rus arbiy şekillernidrüvleri, Herson vilâyetiniñ vaqtınca işğal etilgen topraqlarındaki Nova Kahovka şeeri yanında yerleşken Kahovka gidroelektrik stantsiyasınıñ suv bentlerini patlattılar.

Terrorcılıq aktı neticesinde Ukrainanıñ cenübinde, Herson vilâyetiniñ suvnen basılğan şeerleri, qasabaları ve köylerinde yaşağan on biñlerce ukrain vatandaşınıñ ayatı içün telüke ola bilgen büyük tehnogen felâket ola

Qırımtatar Milliy Meclisiniñ Prezidiumı:

– neticesinde on biñlerce ukrain vatandaşı ölgen kütleviy raketa ve bomba ateşleri, Ukrainanıñ qavmiy toprağındaki yüzlerce şeer, qasaba ve köylerniñ viran etilmesi, Qırım, Donetsk, Luhansk, Zaporijjâ ve Herson vilâyetleriniñ qısımlarınıñ işğalinen ozğarılğan tolu miqyaslı cenk formatında keçirilgen Ukrainağa qarşı rus tecavuzını takbih eterek;

– Ukrainanıñ topraqlarında rusiye federatsiyası ve rus vatandaşlarınıñ yapqanları halqara gumanitar uquqnıñ bozmalarında qabaatlı olğan insanlarnıñ mekeme taqip olunmaları içün Halqara mahsus makeme ceryanını acelen teşkil etilmek kerekligini qayd eterek;

– rus askerleriniñ yapqanları Kahovka gidroelektrik stantsiyasınıñ suv benti ve binalarınıñ patlanması – soñ derecede müim kritik astyapınıñ maqsatlı yoq etilmesine, ealini ve hocalıqlarnı içilir suvdan marum etüvge, Dnipro ve Qara deñizniñ ekosistemalarınıñ bozulmasına yönelgen bir cenk cinayetidir, dep tanıyaraq;

– rf tarafından işğal etilgen topraqlarda rus ordusınıñ topraq, suvlar ve resurslarnı qullanuv rejimlerini temin etken obyektlerni viran etici areketlerini Zaporijjâ ve Herson vilâyetleriniñ ealisiniñ yaşayışı içün dayanılmaz ve telükeli şartlarnıñ yaratılmasına yönelgen olaraq tanıyaraq, halqara cemaatnı ve halqara teşkilâtlarnı, şu cümleden BMT, OSCE, AŞ, AB ve NATOnı, rusiye federatsiyasını öz ordusını Ukrainanıñ topraqlarından çıqarmağa mecbur etmege ve Ukrainanıñ topraqlarında cenk cinayetlerini yapqan rus memurları ve siyasetçilerini mesüliyetke çekmege ve cezalandırmağa yönelgen tedbirlerini acelen baqmağa çağıra.

Qırımtatar Milliy Meclisiniñ Prezidiumı, düyanıñ tamır halqlarınıñ vekâletli teşkilâtlarına halq ögünde Kahovka gidroelektrik stantsiyasınıñ suv bentiniñ patlatılmasını, rusiye federatsiyasınıñ Ukraina devletine ve vatandaşlarına qarşı cinayeti olaraq tanıp, takbih etmege teklif ete.

Refat Çubarov

Qırımtatar Milliy Meclisiniñ Başı

2023 senesi bozarğan aynıñ 6-sı

Kıyiv ş.