Qırımtatar Milliy Meclisiniñ Prezidiumınıñ Halqara tamır halqları kününe bağışlanğan Beyannamesi

09 Avgust 2024

Mustaqil Ukraina devletiniñ demokratik inkişafı maqsadınen ve tamır qırımtatar halqınıñ aqlarını ğayrıdan tiklemek içün Qırımtatar Milliy Meclisi bütün faaliyet seneleri devamında tamır halqlarınıñ aqlarını qorçalav halqara ve milliy uquqiy bazasınıñ şekillenmesinde faalca iştirak ete.

Qırımtatar Milliy Meclisi, 2007 senesi berim ayında BMTnıñ Baş Assambleyasınıñ tamır halqlarınıñ aqları boyunca BMTnıñ Beyannamesiniñ azırlanması, muzakere etilmesi ve qabul etilmesi boyunca uzun ve qıyın esnasnıñ doğrudan iştirakçisi edi.

Qırımtatar Milliy Meclisi 2002 senesi teşkil etilgen berli Birleşken Milletler Teşkilâtınıñ Tamır halqları meseleleri daimiy forumınıñ iştirakçisidir.

Qırımtatar Milliy Meclisiniñ ğayretleri sayesinde ukrain cemiyetiniñ milliy-demokratik küçleriniñ desteginen 2014 senesinden başlap Ukrainada tamır halqlarına nisbeten devlet siyasetiniñ esasları tübünden baqıldı, Ukraina Yuqarı Şurasınıñ 2014 senesi saban ayıñ 20-de qabul etilgen “Ukraina devletiniñ terkibinde qırımtatar halqınıñ aqları kefaletlerine dair Ukraina Yuqarı Şurasınıñ beyanatı aqqında” qararı bunı isbatlay. Anda mustaqil Ukraina tarihında ilk sefer qırımtatar halqı Ukrainanıñ tamır halqı olaraq tanındı ve oña suveren ve mustaqil Ukraina devletiniñ terkibinde öz-özüni belgilev aqqınıñ qoruvı ve amelge keçirilmesi kefil etile.

2021 senesi oraq ayınıñ 1-nde Ukraina Yuqarı Şurası, Ukraina Prezidenti tarafından teşebbüs etilgen “Ukrainanıñ tamır halqları aqqında” Ukraina qanunını qabul etti.

Bu qanun, BMTnıñ tamır halqlarınıñ aqları aqqında beyannamesiniñ esas qaidelerini öz içine alıp, tamır halqlarınıñ temsil organlarınıñ uquqiy statusını pekitmek içün mehanizmler bere ve Ukraina tamır halqlarınıñ kollektiv aqları saasında milliy qanunlarnıñ ilerideki inkişafı ve mükemmelleştirilüvi içün temel bere.

Qırımtatar Milliy Meclisi, Qırımnıñ işğalden azat etilmesi ve Ukraina devletiniñ ve tamır qırımtatar halqınıñ tarihiy vatanınıñ ayırılmaz bir parçası olraq onıñ inkişafı içün ukrain cemiyetiniñ ve Ukrainanıñ halqara ortaqlarınıñ birleşmesi içün ğayretini köstermege devam etecek.

Bu yolda Qırımtatar Milliy Meclisi inana ki, ileride de qırımtatar halqınıñ mustaqil Ukraina devletiniñ terkibinde öz taqdirini belgilev aqqını yerine ketirmesi ve Qırımğa milliy-topraq muhtariyeti statusını bermesi – qırımtatar halqınıñ baqışları ve degerliklerine uyğun siyasiy, iqtisadiy, içtimaiy ve medeniy inkişafını temin etecek yekâne şarttır.

Halqara tamır halqları künü Qırımtatar Milliy Meclisiniñ Prezidiumı Ukraina Prezidenti, Ukraina Yuqarı Şurası, Ukraina Nazirler Kabinetine muracaat etip, Qırımtatar Milliy Meclisinen beraberlikte qırımtatar, qaray ve qırımçaq halqlarınıñ mustaqil Ukraina devletiniñ terkibinde aqlarını temin etmek maqsadınen nevbetteki normativ-uquqiy aktlarnı işlep çıqarmağa ve qabul etmege yardım etmege çağıra.

Qırımtatar Milliy Meclisiniñ Reisi, Rusiye duşmanına qarşı bölüklerinde Ukraina vatandaşlarınıñ – Qırım sakinleriniñ de cenkleşkenleri Ukraina Mudafaa quvetleriniñ askerlerine, Ukraina devletiniñ topraq bütünligi ve suverenitetini qorçalağanda köstergenleri cesürligi ve fedakârlığı içün minnetdarlığını bildire.

Halqara tamır halqları künü hayırlı olsun!

Slava Ukraini!

Refat Çubarov

Qırımtatar Milliy Meclisiniñ reisi

2024 senesi arman ayınıñ 9. künü

Kıyiv ş.