Qırımtatar halqı Meclisi reisi M. Cemilevniñ fikrince Vasiliy Cartınıñ Qırım Nazirler Şurasına reisligi devri belli iz qaldırdı

17 Avgust 2011

Qırımtatar halqı Meclisi reisi M. Cemilevniñ fikrince Vasiliy Cartınıñ Qırım Nazirler Şurasına reisligi devri belli iz qaldırdı. “O, iradeli insan ve küçlü şahıs edi. Onıñ bir çoq qararlarınen razı olmasalar da, o, öz printsiplerine esaslanıp iş kördi. Onda öyle biz çizgiler mevcut edi ki, angileri bugünki Ukraina liderlerine yetişmey. Bu – cesürlik, erlik, printsipialliktir. Eñ mürekkep problemlerniñ çeziminde bile o başta episi millet ve din vekilleriniñ menfaatını tüşündi. Meselâ, Cuma cami içün yer ayıruv boyunca qararı bunı açıq kösterdi, – dep cevap berdi M.Cemilev jurnalistlerniñ sualine Nazirler Şurasında Qırım ükümeti başınıñ vefatı munasebetinen taziye bildirmek maqsadınen bulunğan vaqtında. – Qırımda milletlerara davalarnı qozğağan şovinistik matbuat ve çeşit türlü olmaycaq kimselerniñ afıracaqlarını bile-bile Cartı büyük cami boyunca kesen-kes qarar aldı”.

Meclis reisi şunı da qayd etti ki, biz razı olmağan qararlar da bar edi, amma Cartı işni öyle bir konstruktiv şekilde başladı ki, meselâ topraq problemleri boyunca, ögü qapalı yoldan çıqış körünmekte. “Vaziyet kelecekte nasıl olacağını, men şimdilik tasavur etip olamayım”, – dep qoştı M.Cemilev.

Qırım ükümetiniñ başı vazifesine tayinlevler hususındaki sualge M. Cemilev dedi ki, eger Kiyev mında (Qırımda) “makeyev desantını” qaldırmağa istese, demek o komandadan birisi ve ğaliba bu Pavel Burlakov ola bilir. “Amma, eger de Qırımnıñ tışından mütehassıslarnı ketirmege acet yoq, dep tüşünilse, mında Qırım ükümetine yolbaşçılıq yapa bilecek mütehassıslar az degil”, – dedi M. Cemilev.

M.Cemilevniñ fikrince kütleviy matbuat vastalarında adları yañğırağan adamlar, meselâ Anatoliy Prisâjnük Kiyev vilâyetini Qırımğa deñiştirmege istemez, amma Yanukoviç aytsa… “A. Mogilövnı mında yollamaq qararı aqılsız bir qarar olur, – dep saya M. Cemilev. – Bu endi provokatsiyağa beñzer. Qırımda bu qadar menfiy işlerni yapqan, degil tek qırımtatar halqı, bütün sürgün etilgen halqlar aqqında da pis sözlerni aytqan insannı (Mogilövnı) ükümet başı etip tayinlemek aqılsızlıq olur”.