Qırımdaki işğal makemesi qırımtatar imamınıñ apisini kelecek senege devam etti

12 Oktâbr 2022

Makemeciler, çoq balalı babanı ev tutulmasına yibermek içün aile alını, küçlü içtimaiy bağlarnı ve yaramay sağlığını yeterli bir sebeb olaraq saymadılar.

Rostov-na-Donu şeerindeki rus cenübiy bölge arbiy makemesi imam Rayif Fevziyevniñ tutulmasını 2023 senesi yanvar ayınıñ 23-üne qadar uzattı, dep “Krımska solidarnist” cemiyet birleşmesi haber berdi.

Favziyevniñ qorçalayıcısınıñ rusiye prokurorlığınıñ qorçalayıcı tedbirni uzatuvğa dair inkârına baqmadan makeme, “ola bilgen tabiat kategoriyaları”na köre, Favziyevni daa üç ay tutmağa devam eterek qabaatınen razı oldı.

– Men çoq balalı bir babam. Müsbet köstergiçlerim bar. Prokurorlıqnıñ aytqanı şey, iç bir delilge esaslanmağan tek fikirlerdir. Maña asla iç bir yerge ketmege imkân bermegen menim turğun içtimaiy bağlarım: apay, balalar, ana-baba, aqrabalar bar. Ev tutulma, bilezikniñ kiyinmesini esapqa ala. Yani makemeden qaçamaycağım. Rica etem, meni ev tutulmasına çeviriñiz, – dep Reyif Fevziyev qayd etti.

Rusiye TFH, “akimiyetni mecburen zapt etüvge azırlav” aqqında yañı cinaiy davanı açtı. Mezkür dava, 2021 senesi avgust ayında tintüvlerden soñ tutulğan 5 qırımtatar ve musulman kişisine dair ola. Olarnıñ aralarında da Reyif Fevziyevdir.

Rayif Fevziyev ve Cabbar Bekirov, Rusiye CQniñ 205.5. maddesiniñ 1. qısmı (Terror teşkilâtınıñ faaliyetini teşkil etüv) içün, başqaları ise – Rusiye CQniñ 205.5. maddesiniñ 2. qısmı (Terror teşkilâtında iştirak) içün qabaatlanalar.

Qırım MC ve Aqyar şeeri prokurorlığı, yañı tintüvler ve qırımtatarlarnıñ tutulamalarına mücibi, cinaiy davalarnı açqanı aqqında haber berdi.

Ukraina Prezidenti Volodımır Zelenskıy, rus quvetçileri tarafında yapılğan bu tintüvlerni ve qırımtatarlarnıñ tutulmalarını “insan aqlarını ciddiy bozmalar” olaraq tanıdı, Ukraina TİN ise rusiyege öz narazılığını bildirdi.