Qırım sakinlerini rusiyege etap etmek, daa bir intiqam türüdir, – Meclisniñ başı
![Qırım sakinlerini rusiyege etap etmek, daa bir intiqam türüdir, – Meclisniñ başı](https://qtmm.org/wp-content/uploads/2022/12/9ffe0331-6f13-4e13-acb9-62e0aa178cf7_w1023_r1_s.webp)
rusiye tarafından maküm etilgen Qırım sakinlerini rus apishanelerine etap etmek, faalciler ve aqrabalarına daa bir intiqam türüdir. Radio Svobodanıñ canlı yayınında Qırımtatar Milliy Meclisiniñ başı Refat Çubarov bunı bildirdi.
“Bu, rus işğal akimiyetiniñ alemiyatıdır. Qırımda maküm etilgen bütün siyasiy mabüsler ükümini alacaq soñ rusiye topraqlarındaki apishanelerge yollanırlar ve aynı zamanda Qırımdan uzaq bir yerge oturtmağa ıntılırlar. Bu, daa bir intiqam ve ceza türüdir”, – dep qayd etti o.
Meclisniñ başı qayd etti ki, şimdi Ukrainanıñ rusiyedeki diplomatik vekillikleri, faal etmezler, bunıñ içün advokatlar ve diplomatlar, rusiyede bulunğan maküm etilgen ukrainalılarğa ketemezler.
“Añlaşılır ki, mında aqrabalarınen bağlantıları bozulır. Bu, aqrabaları içün de daa bir azap türüdir, çünki olar, epis etilgen insanlarnı ziyaret etemezler”, – dep Çubarov qoştı.