Qırım işğali devrinde insan aqları eñ az 5 biñ kere bozuldı
![Qırım işğali devrinde insan aqları eñ az 5 biñ kere bozuldı](https://qtmm.org/wp-content/uploads/2023/10/tild3638-3439-4132-a235-666661653335__15_2.jpg)
Foto: HOLOVIN VITALIY
Doquz buçuq sene boyunca Qırımda insan aqları eñ az 5 biñ kere bozuldı, dep qayd etildi. Olarnıñ çoqusı qırımtatar halqınıñ vekillerinen bağlıdır.
“Qırım global. Cenüp vastasınen Ukrainanı añlav” konferentsiyası vaqtında qırımtatar faalcisi, uquq imayecisi, Ukrain institutınıñ müdiriniñ muavini Alim Aliyev bunı bildirdi.
“Soñ 9,5 sene boyunca Qırımda eñ az 5 biñ insan aqlarınıñ bozulması qayd etildi. Umumen olar, qırımtatarlarğa qarşıdır. Rusiye, qırımtatarlarnı terrorcılar ve cinayetçiler olaraq köstererek, olarğa diqqat celp etmege tırışa”, – Aliyev ayttı, dep Qırım.Aqiqat haber berdi.
Keçenlerde Varşavadaki OSCE konferentsiyası (Warsaw Human Dimension Conference) çerçivesinde uquq imayeci teşkilâtları, rus quvetçileri tarafından Qırım sakinleriniñ taqiplerinen bağlı vaziyetni añlattılar. Uquq imayecileriniñ bilgilerine köre, Qırımdaki siyasiy sebepli taqiplerniñ 186 qurbanında eñ az 110-u, qırımtatarlardır. RF quvetçileri tarafından keçirilgen qanunsız tintüvlerniñ 75%-ge qadar tamam qırımtatarlarnıñ evlerine keçirilir.