Qırım işğal astında olğance cenk bitmeycek – Zelenskıy

03 Iyül 2023

Ukraina 1991 senesinden itibaren devletniñ topraq bütünliginiñ qaytmasını RFa qarşı cenkte ğalebe olaraq tanıycaq. CNNge intervyu bergende prezident Volodımır Zelenskıy bunı bildirdi, dep Qırım.Aqiqat haber berdi.

Ukrainanıñ bütün quvetleri cenüp ve şarqtaki topraqlarınıñ qaytarılmasına qoyulğanına baqmadan, prezident “devletniñ soñ maqsadı Qırım azat etmek” olğanını qayd etti.

• Ukrainanı Qırımsız tasavvur ete bilmemiz. Ve Qırım rus işğali astında qalğance cenk bitmeycek, – dep ayttı.

Zelenskıy, Qırımsız bir barışıqnıñ ola bilecegi stsenariyniñ olıp-olmaycağınen bağlı sualge böyle cevap berdi: “O zaman bu ğalebe olmaycaq”.