Prezidentniñ Temsilciliginde Nariman Celâlnıñ azat etilmesi munasebetinen qabul etüv tedbiri olıp keçti

01 Avgust 2024

_{Foto: Ukraina Prezidentiniñ Qırım Muhtar Cumhuriyetindeki Temsilciligi}

Ukraina Prezidentiniñ Qırım Muhtar Cumhuriyetindeki Temsilciliginde Qırımtatar Milliy Meclisiniñ reisiniñ birinci muavini Nariman Celâlnıñ Rusiye apishanesinde qanunsız tutulğanından Ukrainağa qaytması munasebetinen qabul etüv tedibi olıp keçti.

Tedbirde Qırımtatar Milliy Meclisiniñ reberligi ve azaları, ükümet ve parlamentniñ vekilleri, Ukrainada akkreditatsiya etilgen diplomatik korpus iştirak ettiler.

Nariman Celâl tedbirniñ musafirlerine muracaat etip, Qırım mevzusını muzakere etmek ve yarımada aqqında hatırlamaq pek müim olğanını qayd etti.

– İşğalniñ bütün seneleri devamında bir daqqa bile toqtalmayıp, Ukrainağa qarşı 2022 senesi başlanğan silâlı istilânen bu repressiv siyaset ğayet keniş miqyas aldı. Bugün Qırımdaki iç bir Ukraina vatandaşı özüni telükesiz duyamay ve ihtiyac olsa, öz aq-uquqlarını ve serbestligini, öz ayatını qoruy bileceginden emin olamaz.  Qırım sakinleri qorqu ve şübe müitinde yaşamağa mecburlar, bir-birine işançsızlıq, işğalli akimiyetniñ basqısı altında isteklerine qarşı areket etmege mecburlar. İşğal etilgen Qırımda böyle yaşayış şaraiti Rusiye akimiyetiniñ yarımadanıñ ukrain ealisine nisbeten añlı ve maqsatlı cinaiy siyasetiniñ neticesidir, – dep Qırımtatar Milliy Meclisiniñ reisiniñ birinci muavini Nariman Celâl ayttı.

Öz çıqışınıñ soñunda o, dünya ve Ukrainanıñ ortaq ğayretleri Silâlı quvetlerge qol tutmaq kerekligini ve adaletli barışıq tek Ukrainanıñ ğalebesinde mümkün olacağını qayd etti.

– Ukrainanıñ tamır qırımtatar halqınıñ aq-uquqları ve menfaatlarınıñ qorçalavı, Ukrainanıñ öz topraq bütünligi ve suvereniteti içün cenkte ğalebe qazanacaq taqdirinde mümkün olur, – dep Celâl qayd etti.

Qırımtatar Milliy Meclisiniñ reisi Refat Çubarov bildirdi ki, Mecliske qırım siyasiy mabüsleriniñ tuvğanlarından yüzlernen mektüp kele, ve olarnıñ episilerini Narimannıñ azat etilmesi quvandıra, amma er mektüpte oğlum, babam, aqayım ne vaqıt azat etilecek, degen sual bar.

– İnsanlarnıñ öz devletlerinden, halqara toplulıqtan beklegenleri bu vaziyette, yazıq ki, bütün siyasiy mabüslerniñ azat etilmesi imkânsız sayıla. Tek Qırımnı azat etip ve bu repressiyalarnı kerçekleştirgen rus barbarlarından temizlep, ukrain ve qırımtatar halqına qarşı bu taqip ve repressiyalarnı toqtatmaq mümkün, – dep Refat Çubarov qayd etti.

Tedbirniñ iştirakçilerine Daimiy Temsilci Tamila Taşeva da muracaat etti. O, diplomatik korpusnıñ vekillerine muracaat etip, Rusiye tarafından qanunsız tutulğan bütün Ukraina vatandaşlarını azat etmek içün tek umumiy ğayret köstermek kerek olğanını qayd etti.