Nariman Celâl BMTnıñ Şurasında çıqışta bulundı (video)

05 Oktâbr 2024

Qırımtatar Milliy Meclisniñi reisiniñ birinci muavini BMTnıñ İnsan aqları şurasınıñ 57-nci sessiyasında vaqtınca işğal etilgen Qırımda insan aqlarınıñ bozuluvını añlattı.

“Siz menim devletim Ukrainama suvereniteti ve mustaqilligini saqlamaq, topraq bütünligini ğayrıdan tiklemek ıntıluvlarında qol tutmağa devam etesiñiz. Çünki Rusiyeniñ Ukraina toprağında yapqanı qanunsızlıqlarını, insan aqlarını, bütün halqlarnıñ aqlarını bozuvlarını toqtatmaq içün tek devletimizniñ topraq bütünligini ğayrıdan tiklep, memleketimniñ bütün toprağında milliy ve halqara uquqnıñ yerine ketirilmesini temin etmek kerek. Elbette, Rusiye tarafından işğal etilgen Qırımda zapt etilgen ve tutmağa devam etken siyasiy mabüslerniñ azat etilmesine qoşulğanıñız içün teşekkürler bildirem… Bu sene beş sene içinde ilk sefer qırım siyasiy mabüsleri azat etildi – bu men ve bir qaç aftadan soñ genç qız, semetdeşim Leniye Umerovadır. Ve tek halqara toplulıqnıñ, halqara teşkilâtlarnıñ destegi, amma prezidentniñ, ükümetniñ, uquq qorçalayıcılarnıñ doğrudan iştiragi sayesinde, men üç yıl Rusiye apishanesinde yatqan soñ azatlıqqa çıqtım. Amma biñlernen insan, vatandaş Rusiye apishanelerinde tutula. Çoqusını biz bile bilmeymiz”.

Nariman Celâl qayd etti ki, işğalciler Qırımdaki esirlerniñ tuvğanlarını qorquzalar. Bu sebepten qorantalar uquq qorçalayıcı teşkilâtlarnen çalışmağa qorqalar, çünki özlerine ya da yaqınlarına zarar ketirmege istemeyler.

Celâl, Rusiye oña qarşı dava uydurğanını hatırlatıp, apis etilgeniniñ öz ikâyesinde toqtaldı. O hatırlattı ki, işğalciler insanlarnı işbirlik yapmağa mecbur etmek içün davalarnı uydurıp, qabaat “delillerini” köstere, işkencege oğrata, urıp, elektrik ağından keçireler, balaları, qorantalarınen şantaj yapalar, bazıda soy-soplarnı bile azaplaylar. Amma Rusiye makemeleri bütün narazılıqlarğa emiyet bermeyler. O, 42 makeme oturışı olıp keçkenini ve onıñ taqımı davanıñ uydurılğanını isbatlamağa tırışqanını isbatladı. Amma Rusiye makemeleri buña qulaq asmayıp, uydurılğan davalar boyunca sert ükümler çıqardılar.Celâl, Rusiye Ukraina vatandaşlarını Rusiye apishanelerinde öldürmegenine yardım etmek içün Qızıl Haçnı öz vazifelerini yerine ketirmege çağırdı, dep QIRIM.News haber etti.