Mustafa Cemilev ve Refat Çubarov Türkiye Prezidentinen körüştiler

07 Noyabr 2022

“Siyaset ve yañı teşebbüsler” forumı çerçivesinde qırımtatar halqınıñ lideri Mustafa Cemilev ve Meclisniñ başı Refat Çubarov, Türkiye Prezidenti Recep Tayyip Erdoğannen körüştiler. Körüşüvden soñ Erdoğan öz yardımcılarına, körüşüvniñ mevzuları olğan suallerni beraber muzakere etmege ve onı yerine ketirmek içün tekliflerni azırlamağa avale etti.

Noyabr ayınıñ 5-inde İstabul şeerinde “Siyaset ve yañı teşebbüsler” forumı keçti. Anda qırımtatar halqınıñ lideri Mustafa Cemilev, Qırımtatar Milliy Meclisiniñ Başı Refat Çubarov, Ukrainanıñ arab ve musulman devlerlerinen işdeşligi mesleat şurasınıñ kâtibi Snaver Seithalilev ve Qırım Milliy Varlıq Fondunıñ prezidenti Lenur Mambetov iştirak ettiler.

Forumda Türkiye Prezidenti Rеcep Tayyip Erdoğan programma nutuğınen çıqış yaptı.

– Aynı kün Mustafa Cemilev, Refat Çubarov, Snaver Seithalilev ve Lenır Mambetov Türkiye Prezidentiniñ taqımınıñ azalarınen başqa körüşüvlerni keçirdiler. Ukraina, Qırım yarımadasını ve oña yaqın Qara ve Azaq deñizlerini azat etken ve devlet mustaqilligini yañıdan tiklegen soñ Qırımnıñ reintegratsiyasına yardımcı olacaq bazı mevzular muzakere ettiler, – dep Çubarov qayd etti.