Meclisniñ bölge başı İlver Ametovnıñ evi yañıdan tintildi

27 Fevral 2024

Qırımda rus quvetçileri, Meclisniñ Sudaq bölgesiniñ başı, qırımtatar milliy areketiniñ veteranı İlver Ametovnıñ ev müzeyini yañıdan tinttiler.

“Qırım birdemligi” bu aqqında haber berdi.

“Kiçik aynıñ 22-sinde politsiyanıñ hadimleri ve grajdanlıq urbasını kiygen insanlar, Meclisniñ Sudaq bölgesiniñ başı İlver Ametovnıñ ev müzeyini tintmege keldiler”, – dep bildirildi.

 Müzeyini tahminen beş saat devamında tintildi.

Belli olğanı kibi, İlver Ametov yigirmi senedir eski silâ toplana.

“Menim “limomkalar”ım (top silâsına qarşı el grnatası), patronlarım bar, amma olar episi boş. Men çoqtan olarnı boşattım”, — dep Ametov añlattı.

Ametov tüşüne ki, onıñ cemaat faaliyeti ve Meclisniñ bölge başı unvanı sebebinden onı taqip eteler.

“Men ondan vazgeçmem. Halq meni sayladı. Halq, kereksizligimni aytsa, men keterim”, — dep Ametov qayd etti.

Ametovnıñ evini bir qaç kere tinttiler. 2017 senesi mayıs ayında Hersonda elektrik tayamalarını patlatmağa şübelep, işğal quvetçileri Amtovnıñ evini tinttiler. 2019 senesi berim ayınıñ 27-sinde ev müzeyini tintken vaqıt araştırmaq içün Qırımtatar Milliy Meclisiniñ azası, qırımtatar miliy areketiniñ veteranı şeadetnamesi, müzey eksponatları ve bazı vesiqalarını alıp çıqardılar.

2020 senesi arman ayında “Sudaq şeer makemesi” silânı qanunsız olaraq saqlanğan Ametovnı qabaatlı tanıdı. Onı 8 ayğa maküm etti, dep Ukrinform bildirdi.

2020 senesi kiçik ayda işğal etilgen Qırım Yuqarı makemesi, Sudaq şeer makemesiniñ qararını lâğu etti ve davanı yañıdan baqmağa yolladı.