Meclisniñ Başı, Podolâknıñ Qırımnıñ kelecegi aqqında sözlerini tefsir etti

12 Mayıs 2023

Qırımtatar Milliy Meclisiniñ Başı Refat Çubarov, Ukraina Prezidentiniñ Ofisiniñ başınıñ mesleatçısı Mıhaylo Podolâknıñ Qırımnıñ işğalden azat etilecek soñ muhtariyet statusından marum etilmesiniñ mümkünliginen bağlı ilânını tefsir etti. Qırım.Aqiqat bu aqqında haber berdi.

Onıñ fikrince, tamam Qırımnıñ muhtariyetiniñ inkişaf etilmemesi – yarımadada rus boşluğınıñ peyda olmasınıñ sebebi oldı. Qanunnamede qayd etilgen yarımadanıñ muhtariyeti deñişmeli, dep Çubarov tüşüne.

– Podolâk bey tüşüne ki, muhtariyetniñ bar olması – devletniñ bütünligi içün telükedir. Kerçekten de Ukrainada, ayrıca cenk şartlarında bu tür fikirler pek tarqatılğandır. Biz böyle usullarnı añlaymız, amma, misal içün, Qırımda ruslar topraqlarnı qolayca işğal ete bildiler, başqa topraqlarnı baqmadan. Eger anda muhtariyet olmasa edi, er şey yahşı olır edi, depn2014 senesindeki bu vaziyet çoq insannı tüşündirir. Amma Luhanks, Donetsk vilâyetlerinde muhtariyet olmadı. Böylece bu, muhtariyet meselesi degil, Ukrainada umumen devlet siyaseti meselesidir… Qırımda rfnıñ Qara deñiz flotunıñ mevcut olmasını bar hatırlamaq kerek, – dep Meclisniñ başı añlattı.

O qayd etti ki, tamır halqınıñ subyektligi tarafından tesbit etilse edi, şimdiki (Qanunnamede qayd etilgen) muhtariyetniñ deñişmesi bütün qorqularnı yoq ete bilir edi.

– Men iddia etem ki, tamam Qırımnıñ muhtariyetiniñ inkişaf etilmemesi, qırımtatar tamır halqınıñ aqlarını riayet etmeme, Qırımda qavmiy ukrainalılarnıñ aqlarını riayet etmeme, rus qavmiy çoqluğınıñ monopoliyası ve dominantlığı – yarımadada rus boşluğınıñ bar olmasınıñ sebebidir, – dep Çubarov ayttı.

Meclisniñ başı, Avropa parlamentiniñ 2021 senesi kiçik aynıñ 11-indeki rezolütsiyasını hatırlattı. Anda böyle madde yazıldı: “Tamır halqınıñ özüni identifikatsiya ayırılmaz aqqından kelgen Ukrainanıñ terkibinde qırımtatar halqınıñ milliy-topraq muhtariyetini tesbit etilecek deñişmelerni Qanunnamege kirsetmek”.

Keçenlerde Mıhaylo Podolâk farz etti ki, Qırım işğalden azat etilecek soñ onıñ muhtariyet statusı alınacaq. Memurnıñ fikrince, mustaqil devletniñ terkibinde muhtariyetniñ bar olması – separatizm fikirleri içün canlı bir boşluqtır.