Meclis Çehiyanıñ Senatınıñ vekillerinen körüşti

15 Iyün 2023

Bozarğan aynıñ 14-ünde Qırımtatar Milliy Meclisiniñ ofisinde Qırımtatar Milliy Meclisiniñ vekilleri Çehiyanıñ parlament delegatsiyasınen körüşti.

Körüşüvde Çehiya Cumhuriyetiniñ Tış işleri, mudafaa ve telükesizlik meseleleri eyyetiniñ vekilleri: Başı – Pavel FİŞER (Pavel Fischer), Eyyetniñ başınıñ muavini Miroslav BALATKA (Miroslav Balatka), Eyyetniñ azası Vatslav LASKA (Václav Láska), Eyyetniñ azası Marek OŞTAYADAL (Marek Ošťádal), Eyyetniñ azası Yan SOBOTKA (Jan Sobotka) ve Senatnıñ başınıñ muavini Tomaş ÇERNİN (Tomáš Czernin), Ukrainadaki Çehiya Cumhuriyetiniñ Salâhiyetli ve Vekilli Elçisi Radek MATULA (Radek Matula), elçiniñ muavini Yirji PRETSLİK (Jiří Preclík), ekinci kâtip Yan HUDOBA (Jan Chudoba) ve üçünci kâtip Yakub LEVANDOVSKİ (Jakub Lewandowski) iştirak ettiler.

Qırımtatar Milliy Meclisi tarafından körüşüvde Mustafa CEMİLEV – qırımtatar halqınıñ lideri, Ukraina halq mebusı, Eskender BARİİEV – Qırımtatar Milliy Meclisiniñ uquqiy meseleleri ve tış işleri idaresiniñ Başı, Qırımtatar Maaliy Merkeziniñ İdaresiniñ Başı, Riza ŞEVKİYEV – Qırımtatar Milliy Meclisiniñ azası, “Qırım Fondu” HFnıñ Baş müdiri iştirak ettiler.

Körüşüvde Qırımtatar Milliy Meclisiniñ vekilleri, Ukrainanı dünya terrorcı olğan rusiyenen küreşte destek etmesi ve Qırım Platformasında faal iştirak etmesi içün Çehiyanıñ halqına teşekkür bildirdiler, ve parlament delegatsiyasına işğal etilgen Qırımda insan aqlarınıñ bozmalarınıñ tendentsiyaları ve Ukrainanıñ cenübindeki yañı işğal etilgen topraqlarda cenk cinayetleri aqqında haber berdiler.

Mebuslar bildirdiler ki, Çehiyada Mahnitskıy Aktınıñ qanun-analogı tasdıqlandı, bunıñ içün yaqın kelecekte Qırımtatar Milliy Meclisi, işğal etilgen Qırımda insan aqlarını bozğan insanlar cedvelini ve olarnıñ cinayetlerini tasdıqlağan vesiqalarnı berecek.

Parlament delegatsiyasına Çehiya Cumhuriyetiniñ Senatına qırımtatar halqınıñ sürgünligini genotsid olaraq, ve 2014 senesinden Qırımnıñ işğalini onıñ devamı olaraq tanınma aqqında muracaatınen vesiqalar paketi berildi.

Bundan ğayrı, işğal etilgen Qırımdan qırımtatar ve ukrain gençlikleriniñ vekilleriniñ Çehiya Yüksek tasil yurtlarında oqumaları içün stipendiya ayırma imkânını bermege teklif etildi.

Körüşüvniñ soñundan vekilleri bir-birinen hatıra suvenirlerini deñiştiler. Mecliske çeh camından vaza, çeh delegatsiyasına ise Rustem Skibin tarafından yapılğan qırımtatar ornamentinen çanaq ediye etildi.