Kıyivdeki Qırım musulmanları diniy idaresiniñ binası bozuldı

02 Sentâbr 2024

Bugünki rusiye ücümi neticesinde Kyivdeki AMU/QMCMDİniñ islâm medeniyet merkeziniñ (Nivkıdaki cami) binası zarar kördi. Deyerli tüm pencereleri qırıldı, caminiñ yarısı tamir etilmeli.

– Binanıñ pencereleriniñ 90%-i bozulğan. Tek camide degil de, başqa kabinetlerde ve sınıflarda da tavan bozuldı. Bularnıñ episi doğrudan-doğru urulğanından degil de, pek küçlü olğan ücüm dalğasınıñ neticeleridir. Ücüm saba saat 5-ten soñ yüz berdi. 50-60 faiziniñ tamiri kerek olacaq. Tavan tüşti, onı yañıdan qurmaq kerek. Kilimlerni deñiştirecekmiz, çünki olarda çoq cam bar. Birinci qatta pencerelerni qapatmaq içün çalışamız, başqalarını ise levhalarnen qapatırmız. Cami bütünley yıqılsa bile, onıñ faaliyeti toqtatılmay, — dep Qırım müftisiniñ muavini Vadım Daşevskıy Suspilne Qırımğa qayd etti.

Qırımtatar halqınıñ lideri Mustafa Cemilev qayd etti ki, işğalciler 10 daqqa keçken olsa edi, çoq qurban olur edi.

– Eger olar 10 daqqa keçken olsa edi, mında pek çoq ceset olur edi. Çünki bu yerde insanlar dua etmek içün toplaşalar. Mında iç bir arbiy obyekt yoq, yani medeniy obyektni maqsatnen urdılar, — dep Cemilev etti.

Kyivdeki caminiñ yoq etilmesine Ukraina Prezidenti de seslendi. Volodımır Zelenskıy halqara toplulıqnı Rusiye areketlerini maküm etmege çağırdı.

– Rusiye maneviy ya da insaniy qıymetlerge emiyet bermey, ve iç bir din ya da inançnı ürmet etmey. Ukraina halqına qarşı qırğın kampaniyasını devam ete, bütün cemiyetlerimizni ve atta ibadet yerlerimizni yoq etmege tırışalar. Zemaneviy dünyamızda böyle vahşiy areketlerge yer yoq. Halqara toplulıq tarafından kesen-kes takbih etilmeli ve sert areketler yapılmalı, – dep Zelenskıy X`te yazdı.