Kırımtatar jurnalistleri zenaat bayramlarını qayd ettiler

15 Aprel 2012

2012 senesi aprel 14 künü Bağçasarayda İ. Gasprinskiyniñ müzeyinde toplanğan qırımtatar jurnalistleri dörtünci kere öz zenaat bayramlarını qayd ettiler.

“Endi ananege çevirilgen bu körüşüvlerde biz problemlerimizni muzakere etemiz, meslekdeşler olarnı çezüv yollarını ve milliy neşirlerimizni daa da meraqlı yapmaq içün yañı ğayeler teklif eteler, – dep, qayd etti “Qırım” gazetasınıñ baş muarriri Bekir Mamutov. – Ümüt etem ki, mezkür körüşüvler daa da faydalı, milliy jurnalistikamız künü ise umumtürkiy bayram olur”.

Körüşüv iştirakçileri jurnalistler teşkilâtı ve İnternette saife açmaqnı da teklif ettiler. Kelecek sene “Terciman” gazetası çıqqanına 130 yıl tolacağı munasebetinen bu vaqiağa bağışlanğan tedbir keçirmek fikiri de bildirildi.

Aprel 10 (yañı taqvim boyunca aprel 22) Qırımtatar milliy matbuat künü olaraq ilân etilgeni munasebetinen bu hususta qarar leyhası resmiy sürette tesis etilmesi içün Qırımtatar halqı qurultayınıñ nevbetteki sessiyasına taqdim etilecek. Bunıñ kibi de körüşüv iştirakçileri milliy matbuat haimlerini birleştirmek ve gençlerni celp etmek, icadiy problemlerni muzakere etmek, tarih, til ve ananelerni ögrenüv boyunca seminarlar keçirüv maqsadında munaqaşa klubı açılmasınıñ zarurlığını da qayd ettiler.

Körüşüvde milliy neşirlerde halqımız ömüriniñ çeşit saalarını qavrap alğan teren ve obyektiv tenqidiy maqalelerniñ yeterli olmağanı da aytıldı.
“Mında seslendirilgen tekliflerge qoltutam, – dedi Qırımtatar halqı Meclisi reisiniñ birinci muavini Refat Çubarov. – Gazetalarımıznıñ keyfiyetini yükseltmeli. Ebet, müsbet deñişmeler bar, lâkin yeterli degil. Bugünde-bugün ATR televizion kanalınıñ işi bu esnada ibret ola bilir. Tarih boyunca yayınlar, balalar içün eglenceli “Balçoqraq” programması ve “Tatlı ses”” leyhası seyircilerniñ itibarı ve sevgisini qazandı. Refat Çubarov sayt açmaq ğayesine qoltutıp, onı meraqlı malümatları olğan internet-gazeta şekilinde yapmaq kerek, dedi.

“Ebet, er bir neşirniñ inkişafı maliyeviy qoltutuvğa bağlı olğanını añlaymız, – dedi Refat Çubarov. –Lâkin, ne zaman devlet yardım eter, dep beklep, özümiz ise bu vaqıtta eskicesine çalışacaq olsaq, meraqlı ve oqunaqlı gazeta çıqarıp olamamız”. R. Çubarov kelecek körüşüvlerge azırlanğanda, konkret meselelerden ibaret kün tertibini tizmek ve muzakerege yazıcı ve naşirlerni de davet etmekni de teklif etti .

Jurnalistler körüşüvinde Bağçasaray rayon devlet memuriyetiniñ başı İlmi Ümerov, Cumhuriyet milletler komitetiniñ reisi Edem Dudakov, “Maarifçi” birleşmesiniñ reisi Safure Kacametova, “Krım” DTRK qırımtatar muarririyetiniñ reberi Seitislâm Kişveyev, gazetalar, televideniye ve informatsion agentliklerniñ hadimleri de iştirak ettiler.