Kezlevde birinci kere qırımtatar toy-dügün çalğıcılarınıñ «Kezlev dolusı» festivali ötkerildi

10 Mayıs 2012

2012 senesi mayıs 10-da  Kezlevde  qırımtatar toy-dügün çalğıcılarınıñ “Kezlev dolusı”. Festivali keçirildi.  Qırımnıñ 9 taqımını toplap, “Ceval” milliy restoranında ötkerilgen festivalni   köntsern RDR  ve “Odun bazar qapusı”  medeniy-etnografik merkez  teşkil ettiler.  ATR  kanalı ve   “Meydan”.radiosı  festivalniñ media ortaqları oldılar. 

Çalğıcılarnıñ mearetine milliy muzıka saasında tanılğan ustalar  – Cemil Karikov, Rustem Memetov, Raif Aliyev, İbraim İpekçiyev  ve Reşat Ahtemov qıymet kestiler.

Yarış eki  basqıçta keçirilip, er bir ansambl bayramğa  ayrıca bir milliy tüs berip, seyircilerniñ gürdeli elçırpmarını qazandı.  Jüri azaları ise öz nevbetinde  çalğıcılarnıñ yüksek seviyesini qayd eterek, festivalge azırlıqları ve milliy muzıka ve halq ananelerine böyle sayğı köstergenlerini  taqdirlediler.  Festival teşkilâtçılarınıñ aytqanına köre, mezkür tedbir qırımtatar toy-dügün ananelerini saqlap qalmaq,  forlklor muzıkpasını teşviq etmek maqsadında keçirile. “Festivalniñ baş vazifesi ananeviy qırımtatar dügün adetlerini saqlap qalmaq ve zemaneviy  gençlerde halq avalarına sevgi aşlamaqtır”, – dep qayd ettiler teşkilâtçılar. 

Festival musafirleri arasında Qırımtatar halqı  Meclisiniñ reisi Mustafa Cemilev, Bağçasaray rayon devlet memuriyetiniñ başı İlmi Ümerov, Qırım Nazirler Şurası reisiniñ muavini  Aziz Abdullayev, Türkiye Cumhuriyetiniñ Aqmescitteki fahriy konsulı Seyran Osmanov, Meclis prezidiumınıñ azası Ahtem Çiygoz,  “Turkish Airlines”  aviakompaniyasınıñ  Qırımda temsilcisi  Serhat Fil, virtuoz gitaracı  Enver İzmaylov,  çölmekçi usta  Rustem Skibin de buludılar.

Festival iştirakçileriniñ çıqışına jüri azalarınıñ reyting rey berüvi yolunen   qıymet kesilip, onıñ neticeleri boyunca “Qarasu” ansambli ğalebe qazandı ve festival laureatı unvanına nail oldı.  Festivalniñ epsi iştirakçileri qıymetli bahşışlarnen mukâfatlandılar. 

Meclis reisi  Mustafa Cemilev, festival jüri reisi İbraim  İpekçiyev ve  RDR köntserniniñ başı   Zeynur Yaqubov  ğalip çıqqan “Qarasu” ansambline  yañı disk yazmaq içün para mukâfatı ve Rustem Skibinniñ tabağını berdiler.

“Kezlev dolusı” festivaliniñ teşkilâtçıları ve iştirakçilerini işleriniñ birinci neticelerinen hayırlağan Meclis reisi Mustafa  Cemilev şunı da qayd etti ki, böyle tedbirler zengin qırımtatar medeniyetini qorçalav ve inkişaf ettirüvde müim rol oynay.  “Qırımtatar toy-dügünleri sayesinde  bizler sürgünlik yerlerinde qattı rejim altında olğanımızda bile öz asabalığımıznı ğayıp etmedik, saqlap qaldıq” – dedi Mustafa Cemilev.  

Festivalni devam ettirmek planlaştırıla ki,  onda yaz mevsiminde Qırımğa kelgen musafirler de iştirak ete bilsinler.