Kezlev ve Aqyar şeerlerinde patlamalar

05 Yanvar 2024

İşğal etilgen Qırımdaki Kezlevde Yalı Moynaq tarafından pek şiddetli patlama duyuldı. Amma patlama duyulğan soñ ava telükesi sesi kesildi. Avada tuman körüne. Aqyarda da patlamalar duyuldı.

Yerli sakin Suspilne Qırımğa bu aqqında haber berdi.

Kezlevdeki patlamalar

“Kezlevde Yalı Moynaq tarafından pek şiddetli duyuldı. Bundan evel ava telükesi sesi kibi bir signal eşitildi… Patlamadan soñ ava telükesi sesi. Şu anda tuman körüne”, – dep qayd etti o.

Daa bir sakin tafsilâtlıca añlattı ki, Kezlevniñ ğarbında bir şey patladı.

“Patlama pek şiddetli edi. O, şeerniñ ğrabında, Otar Moynaq tarafında edi. O yerde tuman çıqa”, – dep ayttı o.

Aqyardaki patlamalar 

Bundan ğayrı, şaatlar Aqyardaki patlamalar aqqında haber berdiler. Bundan evel anda ava telükesi ilân etildi.

“Şeerde paylamalar duyula. Bazıları daa şiddetli, bazıları şeer tışında kibi duyula”, – dep yerli sakin qayd etti.

Daa bir şaat qayd etti ki, patlama sebebinden evi tiredi. Bundan ğayrı, çoq acele yardım maşnasınıñ sesi eşitile.

“Ava telükesi ilân etilgen tahminen otuz daqqadan soñ eki pek şiddetli patlama duyuldı ve eki tuman köründi. O qadar şiddetli edi ki, tamam yanında bir şey patladı kibi. Acele yardım maşnalarınıñ ne yerge ketkenini bilmeyim, men tek birini kördim, amma evde oturğanda onı alâ daa eşitem… TSUM rayonından baqsaq, biri (patlama – müar.) Fiolent/Kazaçka tarafında, ekisi ise Striletska tarafında”, – dep ayttı o. 

Aynı zamanda Aqyarnıñ işğal gubernatorı Mıhaylo Razvojayev öz Telegram kanalında yazdı ki, “endi bir qaç ava maqsadı tüşüruldi”. 

“Ğluhovadaki evge parça urdı. İlk malümatqa köre bir yaralanğan bar. Ava maqsatlarınıñ bir qısmı Mostova soqağı, Şimaliy tarafta, Monastırskoye qara yol ve Fedüh töpeleri rayoarında tüşti. Qurtarıcı hızmetler yerlerge kettiler”, – dep qayd etti o. 

“Qırım yeli” Telegram kanalınıñ haber bergenine köre, şaatlardan ilk malümatqa köre, raketalardan biri Aqyarnıñ Yuharına yılğasındaki alâqa komandan noqtasına, arbiy qısımğa urdı. Şimdi o yerge acele yardım maşnaları ve qurtarıcılar keteler.Aynı zamanda RF Mudaffa nazirligi bildirdi ki, moskva saati 17:20de Qırımda “kıyiv rejiminiñ aciatsiya aydayıcı raketaları vastasınen obyektlerge terror ücümini yapmaq ıntıluvı toqtatıldı”. Şu cümleden, yarımada üstünde sanki 10 raketa yoq etilgen.