İşğalden azat etmek içün tek arbiy yol qala – Mustafa Cemilev

14 Mart 2023

Bugün Qırımnı işğalden azat etmek içün tek arbiy yol qala, dep Qırım.Aqiqatqa intervyu bergende qırımtatar halqınıñ lideri Mustafa Cemilev qayd etti.

O hatırlattı ki, 2022 senesi kiçik aynıñ 24-ünde Qırımnı işğalden azat etmek içün laf tek barışıq usulları aqqında edi, ve esas aktsent, rusiyege qarşı ğarbiy sanktsiyalarnı çoqlaştırmaq kerekligine yapıldı. Aynı zamanda atta rusiyeniñ tolu miqyaslı tecavuzı başlağan soñ Ukraina, Qırımnı qaytaruv meselesini barışıq yolunen al etmege soñ kere tırıştı.

– 2022 senesi saban ayında İstanbulda rus vekillerinen aytışmalarda ukrain tarafı rusiyege 2022 senesi kiçik aynıñ 24-üne qadar sıñırlarğa öz ordusını ketirmege, Qırım ve Donbas aqqında meselelerni kelecek aytışmalarnıñ mevzusını yapmağa ve olarnı qaytarmaq içün bir qaç sene devamında quvet qullanmamağa söz bermege bile teklif etti. Amma rus tarafı bu teklifni red etip, bildirdi ki, Qırım – “rusiyeniñ toprağı” ve aytışmalarnıñ mevzusı olmaya bilir, – dep Cemilev añlattı.

Onıñ sözlerine köre, “işğal etilgen topraqlarda rus ordusınıñ yapmağa başlağanı şu cinayetlerden soñ Ukraina añlı ve delilli tarzda qarar berdi ki, arbiy cinayetçiler ve terrorcılarnen aytışmalar keçiremez”.

– Bunıñ içün yazıq ki, topraqlarnı işğalden azat etüv tek arbiy yolu qala. Şübemiz yoq ki, imkânlarına köre Qırımnı azat etüv ceryanında öz devletine, vatanına sadıq qalğan çoq insan iştirak etecek. Ve elbette daa çoq motivli olğan ve işğalden eñ çoq zarar körgen tek qırımtatarlar degil, – dep qırımtatar halqınıñ lideri qayd etti.