İşğalciler “Qırım” gazetasınıñ muarriri Bekir Mamutovğa para cezasını berdiler

19 Iyün 2024

Rusiyeniñ kontrolındaki Aqmescitniñ Kiyev rayon makemesi, “Qırım” mustaqil qırımtatar gazetasınıñ muarriri Bekir Mamutovğa para cezasını berdi, dep “Qırım esnası” haber berdi.

2022 senesi makeme onı Qırımdaki mobilizatsiya aqqında qırımtatar faaliniñ intervyusını derc etkeni içün “Rusiye ordusını itibardan tüşürmek içün halq ögünde yapılğan areketlerde” qabaatladı. Bekir Mamutovğa 100 000 ruble para cezasını berdi.

Qayd etildi ki, diñleyiciler oturışqa ketemediler, çünki makemege barmamaları içün terrorcılıqqa qarşı havfıszlıq tedbirleri  sebebinden sıñırlamalar kirsetildi.

Makeme tahminen 20 daqqa devam etti. Uquq qorçalayıcılarnıñ fikirince, bu, bu davanıñ obyektiv ve tolu baqıluvına dair şübeler doğura, dep yaza Qırım.Aqiqat.

Mayısnıñ 17-nde Qırımda Rusiye quvetçileri “Qırım” gazetasınıñ baş muarriri Bekir Mamutov ve “Qırım” gazetasınıñ teşkilcisi Seyran İbragimovnıñ evlerini tinttiler.

Bekir Mamutovnıñ Rusiye ordusını itibardan tüşürgeni ve “Qırım” gazetasınıñ saytında sahte malümatnı doğru malümat kibi derc etilip, tarqatqanı içün eki protokol tizildi.

Gazetanıñ teşkilcilerinden biri Seyran İbragimovğa aynı maddelerge binaen eki protokol tizildi.

1989 senesi oraq ayından berli “Qırım” gazetası qırımtatar tilinde çıqa ve qırımtatarlar Qırımğa qaytqan soñ bu tilde çıqqan ilk neşirlerden biridir.