İşğalciler, imam İsmail Yurdamovnıñ evini tintip onı tuttılar

14 Dekabr 2023

Rus quvetçileri, Qırımnıñ İslâm Terek rayonındaki Cuma Eli köyünde imam İsmail Yurdamovnıñ evini tinttiler. Bundan soñ onı tuttılar ve “politsiya bölügi”ne ketirdiler.

“Qırım birdemligi” bu aqqında haber berdi.

“Saba saat 5:50de evini tintmege başladılar. Bir saat içinde bitirdiler, arbiy urba kiygen adamlar onı Gazelge mindirdiler ve kasaba camisine ketirdiler. Camini de tinttiler, anda er kes bir-birine baqıştı. Bundan soñ onı başqa maşnağa mindirdiler ve İslâm Terek tarafına kettiler. Aqrabaları, şu anda onıñ qayda olğanını bilmeyler”, – deo içtimaiy imayeci Mustafa Seydaliev haber berdi.

İmamnıñ qızı Gülsüm Yurdamovanıñ sözlerine köre, quvetçiler tintüv sebebini bildirmege red ettiler, bundan soñ aileniñ azalarınıñ cep telefonlarını alıp çıqardılar. Bundan ğayrı, tutulğan adamnıñ apayı, onkologiya hastalığını çeke.

“Qapını qaqtılar, politsiya dep ayttılar. Kiyinmek içün vaqıt berip kirdiler. İç bir şey añlatmayıp, er bir suale şöyle cevap berdiler: “şimdi bir adam kelip er şey añlatar”. Amma iç kimse gelmedi… Maddenen bağlı sual da berdim, cevap bermediler. Şaatlarnı taqdim etmege rica ettim, iç kimse cevap bermedi, iç bir vesiqa oqumağa izin bermediler. Bundan soñ babamın alıp kettiler, “camige ketermiz, bundan soñ İslâm Terekke” dep ayttılar. Eki şaat ve adiy urba kiygen eki insan, bir vazife yapsa gerekler. Arbiy urba kiygen, silânen, yüzleri qapalı, belki beş adam edi”, – dep añlattı o.

Saat 09:00da Yurdamovnı İslâm Terek rayonındaki işğal politsiyası bölügine ketirdiler.

Bundan ğayrı, İslâm Terek rayonındaki Kriniçki köyünde faalci Rustem Mustafaevniñ evini tinttiler. İçtimaiy qorçalayıcı Mustada Seydaliev bu aqqında haber berdi, dep “Qırım birdemligi” bildirdi.

Şu anda evini tintmege bitirdiler, Mustafaevni tutmadılar. İçtimaiy qorçalayıcınıñ sözlerine köre, saba saat altıda işğal politsiyasınıñ işçileri onın evine kelgenler.

“Oña evini tintüv aqqında makeme kararını kösterdiler. Onıñ evinde yasaqlanğan edebiyat, silâ, patlayıcı maddeler ve ilâhre saqlansa kerek, dep bildirdiler. Rustem Mustafaev, bu protokolnı izmalamağa red etti”, — dep Seydaliev añlattı.

Birinciden politsiyacılar, Mustafaevniñ evini tinttiler, bundan soñ noutbukı ve cep telefonına baqtılar. Evini tintken soñ faalciniñ “Müiminlerniñ bağçaları” kitabını (imam An-Navaviniñ hadisler cıyıntığı — müar.) alıp çıqardılar.

Rustem Mustafaev, siyasiy sebepli davalar oturışlarını ziyaret ete, kollektiv dualarda, tevqif etilgen qırımtatarlarnı qorçalamaq içün çavuşlar adından hitaplarda iştirak ete.

UPD. İmam İsmail Yurdamovnı politisya bölüginden yiberdiler. Oña qarşı memuriy protokol tizdiler. 

“Añlap-añlamağanlarını bilmegenim böyle bir qabaatnen keldiler. Neticesinde, “qanunsız missioner faaliyeti” maddesini qaldırdılar. Cemaat meni bu yerge saylağanı içün”, – dep Yurdamov añlattı.

Bundan ğayrı, o qayd etti ki, birazdan işğaciler onı “makeme”ge çağırırlar.