İşğalciler Aqmescitte yañı SİZO açtılar

17 Oktâbr 2023

Aqmescitte Rusiye, FSBniñ idare etkeni yañı taqiqat izolâtorını açtı. Öz menbalarına atıf eterek “Qırım uquq qorçalayıcı gruppası” bunı bildirdi.

Şirketler aqqında bütün açıq bilgilerni toplağan SPAK rus sistemasına köre, 24.10.2022 senesi “Federal ceza hızmetiniñ “8. Taqiat izolâtorı” Federal ükümet müessisesi” qayd etildi. Müessiseniñ reberi İdrisov Rauf Maratovıç.

SİZO Aqmescitte böyle adreste qayd etildi: Elevatornıy tar soqağı, 4. Aynı adreste 2. SİZO qayd etildi.

QUQGnıñ bildirgenine köre, şu anda 2. SİZOda aslında ya qabaatlamadan tutulğan ya da “terrorcılıq”, “diversiya” ve “casuslıq” maddelerine mücibi sahte davalarda maküm etilgen siyasiy mabüsler, batalyon komandaları ve ukrain taraflı nazar noqtasınen vatandaşlarnı tutalar.

QUQGnıñ Qırımdaki menbalarınıñ bilgilerine köre, 2023 senesi berim ayında 2. SİZOda “turmuş” cinaiy davalarında qabaatlanğan tevqif etilgen insan yoq.