İrpinde Qırım platformasınıñ üçünci sammitine qırımtatar bayrağı köterildi (foto)

22 Avgust 2023

Tedbirde İrpin şeer başı Oleksandr Markuşın, Kıyiv vilâyet arbiy memuriyetiniñ başı Ruslan Kravçenko, tış işleri naziriniñ birinci muavini Emine Ceppar, Qırımtatar Milliy Meclisiniñ başı Refat Çubarov, Meclisniñ azaları Riza Şevkiyev, Prezidentniñ Qırım Muhtar Cumhuriyetindeki dimiy vekili Tamila Taşeva, Ukraina Ortodoks Kilsesiniñ başı Epifaniy iştirak ettiler.

“Birinciden men, Ukrainağa sadıq qalğan yüzlerce biñ insan aqqında tüşünem. Yüzlerce biñ qırımtatar aqqında, ukrainalı aqqında, başqa milletlerge ait olğan ve beklegen, qarşılıq köstergen, ukrain suverenitetiniñ yañıdan olmasını beklegen insanlar aqqında”, – dep Meclisniñ Başı Refat Çubarov qayd etti.

Tedbirniñ esas haber bericisi, Ukraina Mudafaa nazirliginiñ İBİniñ başı Kırılo Budanov oldı.

“Beklegen insanlar çoq ve olarğa ümütleri kerçekleştireceklerine işanç bermek kerek. Tamam bunıñ içün biz Qırım platforması, vaqtınca işğal etilgen topraqlardaki qarşılıq areketinen tedbirler kibi tedbirlerni keçirmelimiz. Bizim Qırımımızda işğalcileni yoq etmelimiz. Elbette, yaqın künlerde bunı köreceksiñiz”, – dep Budanov anons yaptı.

Qırım işğalden azat etilecegine qadar şeerniñ Merkeziy meydanında qırımtatar bayrağı dalğalanacaqtır.