Hersonda tutulğan ispan göñüllisi Kalatayuda Qırımdaki SİZOdan belli olmağan yerge ketirildi

11 Oktâbr 2023

Berim ayınıñ soñunda rus işğalciler, Hersonda tutulğan ispan göñüllisi Maryano Garsia Kalatayudanı Aqmescitteki SİZOdan alıp çıqardılar.

Esirniñ apayı Tetânağa atıf eterek öz Telegram kanalında Ukraina Yuqarı Şurasınıñ insan aqları vekili Dmıtro Lubinets, bu aqqında haber berdi, dep Qırım.Aqiqat bildirdi.

Bildirüvge köre, bu sene berim ayınıñ soñunda Kalatayudanı Aqmescitteki SİZOdan alıp çıqardılar. Ombudsman tüşüne ki, onı Herson vilâyetiniñ işğal etilgen topraqlarındaki Çonğarda yerleşken “resmiy olmağan taqiqat izolâtorı”na ketirgenler.

«SİZOda Marionı yaşı ve vatandaşlığına baqmadan onı çoq azapladılar. Kalatayudanı Herson vilâyetiniñ işğal etilgen topraqlarındaki Çonğar köyüne ketirgenler. Keçenlerde anda ruslar, resmiy olmağan taqiqat izolâtorını açtılar”, – dep bildirildi.

Keçenlerde bildirildi ki, Qırımnıñ rus akimiyeti tanıdı ki, “RF telükesizligine zarar getirici areketlerge ait olmaq”ta qabaatlanğan ispan göñüllisi Maryano Garsia Kalatayuda Aqmescitteki SİZOda buluna edi.

Maryano Garsia Kalatayuda, sekiz senedir Ukrainada yaşağan ve göñülli faaliyet yapqan İspaniya vatandaşıdır. Saban ayınıñ 19-ında o zaman işğal etilgen Hersonda adam, Ukrainanıñ Birligi numayışına ketti. Birazdan yerli faalciler haber berdiler ki, Marionı Hersonda tutqan ediler, amma bir vaqıt soñ azat ettiler. Göñüllinen bağlanmaq mümkün ve onıñ taqdiri belli olmadı.