Meclis reisi Ukrayina tış işleri nazirinen körüşti

09.02.2026

Kıyivde Qırımtatar Milliy Meclisiniñ reisi Refat Çubarov Ukrayina tış işleri naziri Andriy Sıbiğanen körüşti.

Körüşüv devamında Rusiye tarafından işğal etilgen Qırımdaki vaziyet, halqara meydançıqlarda Qırım mevzusınıñ muzakere etilmesi ve Nazirlik ve Qırımtatar Milliy Meclisi arasında vaqtınca işğal etilgen Qırımnıñ işğalden qurtarıluvı ve integratsiyasına doğrultılğan işlerde ilerideki işbirlik meseleleri baqıldı.

Ukrayina tış işleri naziri Andriy Sıbiğa, hususan, Rusiye tarafından vaqtınca işğal etilgen Qırım toprağında insan aqlarınıñ sistematik bozuluvı, yarımadanıñ arbiyleştirilmesi, qırımtatar halqına ve işğalge qarşı çıqqan ve ukrayin kimligini saqlamağa tırışqan er keske qarşı repressiyalar devam etkenini qayd etti.

Qırımtatar Milliy Meclisiniñ reisi Refat Çubarov, başqa meselelernen beraber, Qırımtatar halqınıñ sesi ve nazar noqtası Qırımnıñ bugüni ve keleceginen bağlı meselelerniñ çezilmesinde müim olğanını qayd etti.

Körüşüv devamında taraflar Qırım meselesiniñ halqara añlaşmalarda er seviyede daimiy sürette bar olmasını temin etmek maqsadınen işbirlikni devam etmege añlaştılar, em de yıl devamında ortaq tedbirlerniñ keçirilmesi ve teşebbüslerniñ ömürge keçirilmesi boyunca areketlerni uyğunlaştırdılar.

“Rusiyeniñ Qırımdaki cinayetleri içün mesüliyetke çekilmesi qaçınılmaz. Qırım – Ukratinadır”, – dep Ukrayina tış işleri naziri yekünledi.