Meclis reisi Qırım işğaline qarşılıq kününe bağışlanğan Varşavadaki tedbirde iştirak etti

27.02.2026

Kiçik aynıñ 26-da Varşava universitetinde Qırım Muhtar Cumhuriyeti ve Aqyar şeeriniñ işğaline qarşılıq kününe bağışlanğan tedbir olıp keçti. Tedbir vaqtınca işğal etilgen Qırımdaki vaziyetni muzakere etmek, Ukrayina ve qırımtatar halqına birdemlik bildirmek içün diplomatik missiyalar ve akademik toplulıqnıñ vekilleri, siyasetçiler, mütehassıslar ve cemaat erbaplarını birleştirdi.

Teşkilâtçıları Ukrayina Elçihanesi Poloniya Cumhuriyetinde, Fundacja Krymski Dom ve Instytut Studiów Interkulturowych Uniwersytetu Warszawskiego Ukrayina Prezidentiniñ Qırım Muhtar Cumhuriyetindeki Temsilciligi ve Qırımtatar Milliy Meclisinen işbirlikte oldılar.

Resmiy qısım çerçivesinde Ukrayinanıñ Poloniya Cumhuriyetindeki Fevqulâde ve Vekâletli Elçisi Vasıl Bodnar, Varşava Universitetiniñ ve Poloniya Cumhuriyetiniñ Ükümetiniñ vekilleri çıqışta bulundılar.

Tedbir iştirakçilerine video muracaatlarınen Qırımtatar Milliy Meclisiniñ reisi Refat Çubarov, Ukrayinanıñ Türkiye Cumhuriyetindeki Fevqulâde ve Vekâletli Elçisi Nariman Celâl, em de Ukrayina Prezidentiniñ Qırım Muhtar Cumhuriyetindeki Daimiy Temsilcisi Olğa Kurışko muracaat ettiler.

Meclis reisi öz çıqışında 2014 senesi kiçik aynıñ 26-sı qırımtatar halqınıñ Rusiye işğaline qarşı açıq qarşılığınıñ timsali olğanını ve Qırımnıñ işğalden azat etilmesi meselesi halqara kün tertibiniñ esas prioritetleri arasında qalmaq kerek olğanını hatırlattı. Qayd etildi ki, Qırımnıñ azat etilmesinden ğayrı, Ukrayinanıñ topraq bütünliginiñ ğayrıdan tiklenmesi ve adaletli barışıqnıñ tesis etilmesi imkânsızdır.

“Qırım meselesi, abartmadan aytqanda, dünya medeniyetiniñ kelecegi meselesi ola. Ukrayinanıñ topraq bütünliginiñ ğayrıdan tiklenmesi küçke degil de, adalet ve halqara uquq printsiplerine esaslanğan halqara tertipniñ ğayrıdan tiklenmesi demektir. Qırım meselesi – qırımtatar halqınıñ kelecegi meselesi ola”, – dep Refat Çubarov qayd etti.

Tedbirniñ ekinci qısmı, işğal etilgen Qırımdaki siyasiy mabüsler ve Nariman Celâlnıñ tarihını añlatqan “Qırımnıñ sesi. Nariman Celâl” adlı vesiqalı filmniñ taqdimine bağışlandı. Vesiqa Jurnalistika laboratoriyası tarafından 2023 senesi, Qırımtatar Milliy Meclisiniñ reisiniñ muavini işğal etilgen Qırımda Rusiye apishanesinde bulunğan vaqıt çıqarılğan edi.

Varşavadaki tedbir, halqara toplulıqnıñ işğal etilgen Qırımda insan aqlarınıñ bozulmasına diqqatını celp etmek, qırımtatar halqına qol tutmaq ve Qırım mevzusını cemaat ve akademik munaqaşalarda saqlamaq içün müim meydançıq oldı.

FОТО: Ambasada Ukrainy w Rzeczypospolitej Polskiej/Посольство України у Польщі