Frankfurter Allgemeine Zeitung alman gazetası Celâlnıñ mektübini yayınladı

09 Fevral 2023

Qırımda gaz ağında diversiya davasında maküm etilgen Meclisniñ ilk muavini Nariman Celâl (vesiqalarğa köre, Celâlov) SİZOdan mektüp yazdı. Frankfurter Allgemeine Zeitung alman gazetası onı yayınladı. Qırım.Aqiqat bunı yazdı.

Mektübinde Celâl añlattı ki, “memuriy para cezaları ve TFHniñ mağazlarında tevqifler, insanlarnı tutuvlar ve azaplar, sahte cinaiy davalar ve aqiqiy adliyeniñ mevcut olmaması, insanlarnıñ öz fikirlerini bildirmek ve qanuniy aq-uquqlarını qorumaq niyetlerine rus akimiyetiniñ cevabı oldı”.

– Rusiyeniñ Ukrainağa tolu miqyaslı tecavuzınıñ başlanğıcından soñ vaziyet pek yaramazlaştır, – dep Celâl qayd etti.

Onıñ sözlerine köre, “Ukraina vatandaşları terrorcılıq, diversiya, cinayetler, qanunsız silâlı teşkilâtlarda iştirak içün tamamınen sebepsiz qabaatlanalar”.

– Aynı zamanda qabaatqa baqmadan, TFH umumiy stsenariyge köre davalarnı sahteleştirir, – dep Celâl qayd etti.

O, avropa ülkelerini Ukrainanı destek etmege, siyasiy mabüslerni deñiştirmege talap etmege çağıra. Celâl, Rusiyeniñ qırımtatar halqını ayırımına diqqat çeke.