Felemenkte Ukraina elçisi qırımtatar cemaatınen körüşti

10 Avgust 2023

_{Fotosuret: Facebook/Embassy of Ukraine in the Kingdom of the Netherlands}

Halqara tamır halqları künü Felemenkteki Ukraina Elçisi Oleksandr Karasevıç, qırımtatar cemaatınıñ vekillerinen körüşüv keçirdi.

Körüşüv vaqtında cemaatnıñ faaliyeti, qırımtatarlarnıñ medeniyetini saqlamaq içün medeniy ve sanat tedbirlerini keçirüvnen bağlı meseleler muzaker ettiler.

Ayrıca Elçi, devletniñ başınıñ idaresinen Qırımnı qaytaruv ve reintegratsiya etüv siyasetiniñ azırlanmasına dair şu anda keçirilgen kompleksli iş aqqında haber berdi. Bundan ğayrı, yarımadanıñ işğalden azat etilmesi ve Felemenkniñ bu ceryanda faal rolüne dair siyasiy teşebbüslerni muzakere ettiler.

Qırımtatar cemaatı – ukrain cemaatınıñ ayırılmaz qısmıdır. Onıñ birleşken ve bizim Ğalebemizni yaqınlaştırmaq içün Felemenkteki bütün ukrainalılarnen çalışmağa azır olğanı müimdir!