Esirlerni aza etmek içün Ukraina ve rusiye gumanitar koridornı aça bilirler

16 Yanvar 2023

2014 senesinden berli RFnıñ tutqanı biñlerce kişi qayta bilirler. Türkiye de yaralanğan ukrain askerlerini alıp, tedaviylemege ve evlerine qaytarmağa azıd.

Türk ombudsmanı Şeref Malköçniñ iştirakinen Ankaradaki rus tarafınen üç künlik aytışmalardan soñ Yuqarı Şurasınıñ insan aqları vekili Dmıtro Lubinets, esirlerni qaytarmaq içün gumanitar koridornıñ teşkil etilmesini añlattı.

Arbiy esirlernen tutuv meseleleri koordinatsiya ştabı Telegramada bu aqqında haber berdi.

⁃ Dmıtro Lubinetsniñ bildirgenine köre, şu anda taraflar gumanitar kordirnı teşkil etmege çalışalar. Onıñ çerçivesinde esirlerni ve tutulğan kişilerni deñiştirüv ceryanları daa semereli keçirilir. Şu cümleden, laf ağır yaralanğan, qart insanlar, balalar, askerler ve Ukraina vatandaşlarını evlerine qaytaruv aqqındadır, – beyanatta yazıldı.

Lubinetsniñ sözlerine köre, körüşüv vaqtında rusiyeni Jenevre şartnamesiniñ 110. maddesinde qayd etilgeni kibi ağır yaralanğan insanlarnı evlerine şartsız qaytarmaq kerekligini tanımağa muvafaqiyetnen mecbur etildi. Ukrain tarafı qayd etti ki, bu vaqiada bu, bir deñişme degil, reparatsiyadır. Ve rus tarafına 800 ağır yaralanğan ukrain askeriniñ adlarınen cedvelni berdi. 

⁃ Biz bunı rus tarafına añlattıq. Onıñ endi razı olğanını ve yapmağa başlağanını aytamam, amma olar bunıñ Jenevre şartnamesinde kerçekten mevcut olğanını tanıdılar, – dep ukrain ombudsmanı qayd etti.

Bildirildi ki, 2014 senesinden berli rus esirliginde alâ daa bulunğan grajdan ukrainalılarnı azat etüv aqqında aytışmalar devam eteler – şu anda mezkür cedvelde 377 kişi bar.

⁃ Bundan ğayrı, 158 ukrainalıdan ibaret ve çoqusı qırımtatar olğan kreml siyasiy mabüslerini qurtaruv aqqında laf bar edi, – dep Arbiy esirlernen tutuv meseleleri koordinatsiya ştabı qayd etti.

Fevral ayınıñ 24-ünden soñ Ukrainada tecavuzcınıñ tutqanı vatandaşlarnıñ sayısınen bağlı sualge cevap bergende Dmıtro Lubinets bildirdi ki, şu anda yaqınlarını qıdırğan 20 biñ aile oña hitap etti.

– Bu büyük bir raqam, ve bu Ukraina vatandaşları rus tarafınen alâ daa muzakere etilmedi. Biz bunı yaptıq, – dep Lubinets qayd etti.

Aytışmalarnıñ ayrı mevzusı – Ukrainadan rusiyeniñ topraqlarına ketirilgen ukrain balalarını evlerine qaytarmaqtır. Şu cümleden, tecavuzcı bir devlette vasiylik ceryanları başlanğan Ukraina kiçik vatandaşlarını nasıl azat etmek meselesi al etile.

Lubinets qayd etti ki, Türkiye prezidenti gumanitar koridornı teşkil etüv ğayesini destek etti. Bu aytışmalarda qırımtatar halqınıñ lideri Mustafa Cemilev de faal olaraq iştirak ete.