Eñ az 200 – uquq qorçalayıcılar Qırımdaki esirlerniñ sayısını bildirdiler

10 Yanvar 2023

İşğal etilgen Qırımda tutulğan esirlerniñ sayısı eñ az 200 kişidir. Olar aralarında ruslarnıñ Herson ve Zaporijjâ vilâyetlerinden ketirgenleri ecnebiyler de bar, dep İçtimaiy radionıñ canlı yayınında “Qırım uquq qorçalayıcı gruppası”nıñ başı Olha Skrıpnık haber berdi. 

– Bizim teşkilâtımıznıñ tasdıqlağanı ve vesiqalaştırğanı bir qaç on… İnsanlarnı, Ukrainanı destek etmeler içün taqip eteler. Bundan ğayrı, “Hizb ut-Tahiri” teşkilâtında sanki iştirak etmeleri içün çoq qırırmtatarnı taqip eteler. Ve Yehovanıñ şaatlarını taqip eteler, – dep uquq qorçalayıcı qayd etti.

Rus akimiyeti, tutulğan Ukraina vatandaşlarına devlet advokatlarını bile bermege toqtadı, dep qoştı.

– Yani bu insanlarnı ketirip, TFHnıñ azaphanelerinde azaplaylar ve epsi bu. Ayrıca bu, “cinaiy davalar” açılmağanlarğa ait – olar tek epis etildi, ve advokatlarınıñ kişini ziyaret etmek içün resmiy sebepleri yoq, – dep Skrıpnık añlattı.

Uquq qorçalayıcınıñ sözlerine köre, eger bir insanğa qarşı cinaiy dava açılsa, añlaşmağa mücibi onıñ advokatı bar: “Bu, qoçalamağa, bu insanlarğa destek etmege tırışqan mustaqil advokatlar”.

Skrıpnıknıñ bildirmelerine köre, faqat buna baqmadan, rus quvetçileri, advokatlarnı esirlerge yibermemek içün sebeplerni qıdıralar. 

Qırımdaki öz menbalarına atıf eterek, ZMINA insan aqları merkezi bildirdi ki, ruslarnıñ qanunsız olaraq işğal etilgen topraqlardan aneksiya etilgen Qırımğa ketirgenleri ukrainalılarnı Aqmescitteki SİZOda ayrı binalarda tutalar. Olarnı işkence eteler, advokatlarnen körüşmege red eteler.

Hatırlatamız ki, keçenlerde qırımtatar faalcisi ve siyasetçisi Nariman Celâl, RFnıñ işğal etilgen ukrain topraqlarında tutıp alğanı ukrainalılarnı işkenceler etemeleri aqqında añlattı.