Elvida, Server EBUBEKIROV!

27 Iyül 2023

Bağçasarayda 1988 senesinden berli yaşağan, medeniy ömürimizniñ erbaplarından biri, Han-Saray müzeyiniñ ilk müdiri Server Üzeir oğlu EBUBEKIROV vefat etti.

Server efendi 1951 senesi ğurbetlikte, Samarqand vilâyetiniñ Koytaş köyünde doğdı. Tamırları – ana taraftan Bağçasaray rayonınıñ Çorğuna köyünden, babası Mamaşaylı.

Samarqandda mektepni bitirgeninen Server EBUBEKIROV, Taşkent pedagogika institutında 1968 s. açılğan qırımtatar tili ve edebiyatı bölüginiñ studenti ve beş yıldan soñ mezkür bölükniñ birinci mezunlarından oldı. Mektepte zenaatı boyunca dersler berdi.

1980-ncilerniñ başında o, eki yıl “Lenin bayrağı”nda terciman, mühbir vazifererini eda etti. Soñra Kavkazğa köçip, anda zenaatından tış işlerde çalıştı.

1988-de Server efendi Qırımğa, Bağçasarayğa avdet oldı. Yerli müzeyge işke kirmege tırıştı, amma milliy mensüpligi buña bir qaç vaqıt mania oldı. Bir yıldan soñ onı ilmiy hadim olaraq qabul ettiler, 1991 s. ise yañı açılğan İ. Gasprinskiy bölügine müdir etip tayinlediler. Bu bölükniñ esasında soñra büyük erbap ve mütefikkirimizniñ ayrı müzeyi teşkil olundı.

1996 s. Han-Saray temelinde Qırımtatar tarihı ve medeniyeti müzeyi açılğanda Server EBUBEKIROV onıñ ilk müdiri oldı ve bu vazifede 2011 senesinece çalıştı. Nefaqağa çıqqan soñ tetqiqat işlerini – şu cümleden, özü meraqlanğan Qırım Hanlığı peyda oluvı deviriniñ ögrenmesini devam etti.

Qırım işğalinden soñ onıñ araştırıma imkânları sıñırlandı ve evelki ilmiy alâqaları, deyerli, üzüldi. Amma o, Ukraina geraldik cemiyetiniñ azalığını saqlap keldi.

Server efendi çoq bilgili mütehassıs olıp, medeniyetimizniñ ayırılmaz qısımı – müzeylik işlerine, milliy asabalığımıznı saqlanmasına öz salmaqlı issesini kirsetti.

Server Üzeir oğlu EBUBEKIROV vefatı munasebetinen onıñ ömür arqadaşı Naciye hanımğa, qorantasına, cümle aqrabalarına teren taziye bildirip, baş sağlığı tileymiz.

Allah rahmet eylesin!

Qırımtatar Milliy Meclisi