“DHC”de hızmet etmeleri içün Qırımnıñ sakinlerini Rusgvardiyasına çağıralar

11 Avgust 2023

İşğal etilgen Qırımda Rusgvardiyasınıñ İdaresi, Qırımnıñ sakinleriniñ böyle degen “Donetsk Halq Cumhuriyeti”nde añlaşmanen hızmet etmeleri içün çağıra. Aynı zamanda göñüllilerni arbiy areketlerge degil, tek Donbasnıñ yañı işğal etilgen topraqlarını kontrol etmeleri içün yollamağa söz bere. Qırım saytlarında çağıruv beyannamesi yayınlandı, dep Jurnalist taqiqatı merkezi haber berdi.

Beyannamelerge köre, Qırım Cumhuriyeti ve Aqyar şeerindeki Rusgvardiyasınıñ Baş idaresi “añlaşma yazıp, Donetsk halq cumhuriyetiniñ azat etilgen topraqlarda serjant ve asker unvanlarında hızmet etmeleri içün RF Silâlı Quvetleriniñ yedeginde bulunğan vatandaşlarnı saylaylar”.

18 – 50 yaşındaki göñüllilerni para ve çeşit-türlü bonuslarnen çağıralar. Olarğa aynı zamanda 195 biñ ruble ve aynı aylıqnı ödemege, mesken, bedava aş ve tibbiy teminatnı bermege söz bereler. Senelik tatiller – 45 kündir.

Beyannamede qayd ettiler ki, mudafaa nazirliginiñ bölüklerinden ğayrı, Rusgvardiyası faa arbiy ücüm areketlerini yapmaz, onıñ vazifesi – topraqlarnı kontrol etmektir.