Meclis vekilleri Türkiye parlamenti tış işler eyyetiniñ reisinen körüştiler

24.11.2025

Stokholmda Halqara Qırım platformasınıñ Dörtünci Parlament sammitinde Qırımtatar Milliy Meclisiniñ vekilleri Türkiye Büyük milliy meclisiniñ tış işler eyyetiniñ reisi Fuat Oktaynıñ yolbaşılığı altındaki Türkiye eyyetinen iş körüşüvini keçtirdiler.

Körüşüvde Meclis reisi Refat Çubarov, em de Meclis azaları Eskender Bariiev, Gayana Yüksel, Riza Şevkiyev ve Abmedcit Süleymanov iştirak ettiler.

Muzakereler vaqtında Fuat Oktay, Türkiye Ukrayinanıñ topraq bütünligine qol tutmağa devam etecegini ve halqara alanda qırımtatar halqınıñ aqlarını qorçalamağa devam etecegini bildirdi.

Meclis vekilleri Türkiye tarafına işğal etilgen Qırımda ve onıñ tışında qırımtatarlarnıñ rastkelgenleri esas meseleler aqqında tarif ettiler:

• siyasiy taqip ve repressiyalar,
• ana tilinde tasil almaqnıñ sıñırlanması,
• işğal etilgen topraqta tuvğanlarınen bağ tutmaq içün qıyınlıqlar
• insan aqlarınıñ sistematik bozuluvı.

Meclis vekilleri 2026 senesine olğan prioritet planları arasında nevbetteki Bütündünya qırımtatar kongressiniñ keçirilmesini qayd ettiler. Soñki sefer 2015 senesi Ankarada keçirilgen edi, ve o vaqıttan berli Qırımdan ketmege mecbur olğan qırımtatarlarnıñ sayısı bayağı arttı. Yañı bir diaspora meydanğa keldi, oña dünya boyunca işbirlikni numayış etmek, idare etmek ve quvetleştirmek içün platforma kerek.

Ayrıca qayd etildi ki, Türkiyeniñ ukrayin arbiy esirleri ve vatandaşlarınıñ, hususan qırımtatar siyasiy mabüsleriniñ deñiştirilmesi ve azat etilmesinde faal rolüni devam ettirmek müimdir.

Fuat Oktay işandırdı ki, köterilgen meseleler onıñ şahsiy nezaretine alınacaq ve Türkiye tarafı olarnı ameliy çezüv yollarını qıdıracaq.