Çubarov Qırımnıñ milliy-topraq muhtariyetini Qanunnamede qayd etmege çağırdı

25 Oktâbr 2022

Qırımtatar Milliy Meclisiniñ başı Refat Çubarov, qırımtatarlarnıñ Qırımda muhtariyet almaları içün, Ukraina Qanunnamesine deñişmelerni kirsetmege çağırdı. “Qırım platforması”nıñ olğanı Hırvatistannıñ paytahtı Zahreb şehrinde bunı ayttı, dep “İnterfaks-Ukraina” haber berdi.

– Biz Ukraina Qanunnamesine deñişmelerni kirsetmelimiz. Anda qırım muhtariyetini milliy-topraq hususiyetine mücibi Qırımnıñ tamır halqınıñ – qırımtatarlarnıñ özüni tanıma şekli olaraq yaratılğan bir muhtariyet olaraq tanımalımız, – dep Çubarov ayttı.

O qayd etti ki, Ukraina Qanunnamesine mücibi, Qırım bir muhtariyet ola, faqat bu statusnı yañıdan şekillendirmek kerek, “Qırımda özüni tanıma subyektini, qırım muhtariyetiniñ menbasını endi tayin etmek kerek. Ve bu menba – bu yarımadanıñ tamir halqınıñ mustaqil Ukraina devletiniñ terkibinde özüni tanıma ayırılımaz aqqıdır”.

Çubarov qayd etti ki, aynı zamanda bu mehanizm vastasınen, tamır halqınıñ özüni tanıması vastasınen «Ukraina devletinin ukrainalığı, devlet toprağımızın parçasını pekitüv ve qavmiy ve diniy mensüplilkke baqmadan insan aqlarını temin etüv» meselelerini al etmek kerek.