Çehiya, qırımtatarlarnıñ sürgünligini genotsid aktı olaraq tanıya bilir

01 Mayıs 2023

Çehiya Prezidenti Petr Pavel, parlamentniñ azalarınen 1944 senesi qırımtatar halqınıñ sürgünligini genotsid aktı olaraq tanıma meselesini muzakere etmege niyetlene.

Ukrainanı ziyaret etken soñ Prahada brifingte bunı bildirdi, dep Ukrinformnıñ mühbiri haber berdi.

Pavelniñ sözlerine köre, uzun zaman devamında Sovet Birliginde Stalinniñ ükümdarlığından berli qırımtatarlar rusiye tarafından zulum çekeler. Çehiya Prezidenti Ukrainanı ziyaret etkende Çehiyanıñ 1944 senesi qırımtatarlarnıñ sürgünligini tekbih etken ve genotsid aktı olaraq tanığan ülkelerge qatılması içün bu halqnıñ vekilleri oña muracaat ettiler.

– Keçenlerde olğan vaqianı kerçekten de genotsid adlandırmaq mümkün. Sovet Birliginde bunı köçüv adlandırğanlarına baqmadan… Bu köçüvniñ genotsidniñ bütün alâmetleri bar edi, – dep prezident ayttı ve parlamentniñ azalarınen bu meseleni muzakere etecegini qoştı.

Bundan ğayrı o qoştı ki, 1968 senesi Sovet Birligi Çehoslovakiyanı işğal etken soñ qırımtatarlar Çehoslovakiyanı destek ettiler ve çehler bunu unutmamalılar.

Çiçek ayınıñ 28-29 künleri Slovakiya prezidenti Zuzana Çaputovanen beraber Çehiya Prezidenti Petr Pavel Ukrainanı ziyaret etti.