Cebede qırımtatar Eskender Nimetullayev elâk oldı

07 Fevral 2023

2023 senesi kiçik (fevral) aynıñ 4-ünde Ukrainanıñ Şarqında Ukrainanıñ topraqlarına istilâ etken rus varvarlarına qarlı cenkte Ukraina Milliy Gvardiyasınıñ yuqarı askeri Eskender NİMETULLAYEV elâk oldı.

2002 senesi berim (sentâbr) ayınıñ 2-sinde Herson vilâyetiniñ Geniçesk rayonınıñ Novooleksiyivka qasabasında Eskender NİMETULLAYEV doğdı. O, İsmail ve Anife NİMETULLAYEVniñ ailesinde ilk balası edi, bundan soñ Ayder (2004) ve Şevhiye (2010) doğdı.

Eskender Herson vilâyetiniñ Geniçesk rayonınıñ Novooleksiyivka umumiy tasil 1. mektebinde oquy edi, onı bitirgen soñ 2019 senesi Herson devlet deñiz akademiyasınıñ İhtisasiy-deñiz litseyine kirip 2020 senesi muvafaqiyetnen bitirdi.

2020 senesi ilk qış (dekabr) ayında Eskender NİMETULLAYEV Ukraina Milliy Gvardiyasına müddetli hızmetke çağırıdıldı. Eskenderniñ hızmet etkeni bölük Luhansk vilâyetinde yerleşe.

Er vaqıt Eskender NİMETULLAYEVniñ büyük cevapkâr duyğusı bar edi, komandanları ve hızmetdeşleri onı qadirine yete ve ürmet ete ediler.

2022 senesi berim ayında Eskender NİMETULLAYEV imtian berip Devlet ticaret-iqtisadiyat universitetiniñ (Kıyiv) ğıyabiy bölüginiñ birinci sınıfqa kirdi.

Qusursız hızmet be ihtisaslıq içün Eskender NİMETULLYEV çoq kere komandanlıq yaptı, 2022 senesi mayıs ayında Ukraina Milliy Gvardiyasınıñ komandanınıñ emrinen Eskender, “Şanlı hızmet içün” köküs işaretinen mukâfatlandırıldı.

Qırımtatar Milliy Meclisi ve men şahsen, böyle büyük bir ğayıp – Eskender NİMETULLAYEVniñ ölümi sebebinden yaqınlarına ve aqrabalarına: İsmail baba, Anife ana, Ayder qardaş, Şevhiye qız qardaş, ve arbiy qardaşları, dostaları, Geniçesk rayonınıñ Novooleksiyivka qasabasınıñ sakinlerine taziye bildiremiz.

Allah rahmet eylesin!

Refat Çubarov,

Qırımtatar Milliy Meclisiniñ başı

Kıyiv ş., 2023 senesi kiçik aynıñ 6-sı