Avropa birligi, Qırımda maküm etilgen ukrain jurnalistlerini acelen azat etmege çağırdı

29 Mart 2023

Avropa Birligi, qanunsız olaraq tutulğan er bir ukrain jurnalistini, şu cümleden İrına Danılovıç, Vladıslav Yesıpenko, Asan Ahtemov ve başqalarını acelen azat etmege çağırdı.

BMTnıñ insan aqları şurasınıñ oturışında İsveçiyaniñ elçisi ve Jenevadaki halqara teşkilâtlarnıñ uzurında daimiy vekili bunı bildirdi, dep INcir Mediası haber berdi.

– Avropa Birligi, qanunsız rus akimiyeti tarafından qanunsız olaraq işğal etilgen Qırımda ukrain jurnalistlerine, şu cümleden İrına Danılovıç, Vladıslav Yesıpenko ve Asan Ahtemovğa dair çıqarılğan böyle degen “makümler”ni takbih ete ve qanunsız olaraq tutulğan er kesni acelen azat etmege çağıra, – dep bildirildi.

Bundan ğayrı Avropa Birligi öz ilânında rusiyeni Ukrainağa qarşı cenkini bitirmege daa bir kere çağırdı.

– Biz, Rusiyeniñ Ukrainağa tolu miqyaslı tecavuzını pek takbih etemiz. Ukrainağa qarşı sebepsiz ve manasız tecavuzlı cenki vastasınen Rusiye, halqara uquqnı ciddiy tarzda boza, BMTnıñ Nizamnamesiniñ maqsatları ve printsiplerine qarşı çıqa ve cian barışığı ve telükesizligini ciddiy tarzda boza. Biz Rusiyeni devam etken tecavuznı acelen, tamamınen ve soñuna qadaar bitirmege, öz quvetleri ve arbiy tehnikasını Ukrainanıñ topraqlarından çıqmağa, Ukrainanıñ halqara olaraq tanınğan sıñırlarında suvereniteti, mustaqilligi ve topraq bütünligini tamamınen izzet etmege daa bir kere çağıramız, – dep haber berildi.