Aqmescitteki SİZOda ukrainalılarnı esirlikte tutalar – QUG

17 Yanvar 2023

Vaqtınca işğal etilgen Qırımnıñ Aqmescit şeerindeki 2. SİZOda bulunğan insanlarnıñ yarısını esirlikte tutalar. Olarğa qarşı cinaiy davalar açılmaylar.

 Ukrinformğa tefsir etkende Qırım uquq qorçalayıcı gruppasınıñ idaresiniñ başı Olha Skrıpnık bunı añlattı.

– TFH, yañı işğal etilgen topraqlarda alınğan kişilerni tutmaq içün Aqmescitte 2. SİZOnı açtı. Mezkür insanlarnıñ qısmına qarşı cinaiy davalar açmadılar, – dep Skrıpnık ayttı.

O qayd etti ki, iç kimseniñ olarğa işirişi yoq, olarğa advokat bile bermeyler.

– Olar iç bir uquqiy desteksiz qalalar. Çünki cinaiy dava olmasa, advokat bermek içün sebep olmaz. Belli ki, bu insanlarnı er kesten gizli tutalar. Olarnen ne yapqanlarını kimse ögrenmemesi içün, – dep Skrıpnık qayd etti.

Uquq qorçalayıcı qoştı ki, işğalcilerniñ Herson ve Zaporijjâ vilâyetleriniñ vaqtınca işğal etilgen topraqlarında qanunsız olaraq tutqanları kişiler, işkence qurbanları olalar.

– Birinciden yañı işğal etilgen topraqlarda rus ordusı ya da rus gvardiyası olarnı azaplaylar. Bundan soñ qırım SİZOğa ketirip, TFHçiler, tutulğanlarnıñ qabaatını itiraf etmeleri içün, olarnı azaplaylar. Bu er keske ait: em advokatlarnen, em de advokatsız kişiler, – dep aktsent yaptı.

Skrıpnık qayd etti ki, berilgen advokatlar, işkencelerni gizlegen ve sahte davalarda insanlarnı qabaatlarını itiraf etmege mecbur etken TFHniñ vekilleridir. Onıñ sözlerine köre, tek bazı davalarda mustaqil advokat almağa becere.

  Bundan ğayrı, vaqtınca işğal etilgen Aqmescitniñ 1. taqiqatçı müstemlekesinde tecavuzcılar esirlerni rus ordusı terkibinde Ukrainağa qarşı cenkleşmege mecbur eteler.

– Tasdıqlanğan malümatımızğa köre, Aqmescit şeeriniñ 1. taqiqatçı müstemlekesinde tecavuzcılar, cinaiy maddeler içün tutulğan esirlerni rus ordusı terkibinde Ukrainağa qarşı cenkleşmege mecbur eteler, – dep Skrıpnık ayttı.

Onıñ sözlerine köre, cinayetler sebebinden maküm etilgen kişilerni cenkleşmege mecbur etüv ceryanı Rusiyede tarqatılğandır. Ayrıca bu, şiddetli rejimli müstemlekede ciddiy cinayetler içün ceza alğan kişilerge aittir.

Aynı zamanda Skrıpnık bildirdi ki, şu anda işğalcilerniñ siyasiy mabüslerni Rfnıñ Ukrainağa qarşı cenkine ketmege mecbur etmeleri (Rustem Osmanovnıñ vaziyeti kibi) tarqatılğan degil, istisnadır.