Aqmescitte rus işğalcileri, teraktnı azırlamağa qabaatlanğan qadınnı tuttılar

18 Mart 2024

Aqmescitte rus quvetçileri, demiryolnı ateşke bermege azırlağan qadınnı tutıp qapattılar. Rusiye kütleviy haber vastaları, Rusiye FSB-siniñ matbuat hızmetine atıf etip, bu aqqında haber berdi, dep Qırım.Aqiqat bildirdi.

”Aqmescitte keçirilgen tedbirler neticesinde 1999 senesi doğğan Rusiye vatandaşı tutuldı. O, Ukraina mahsus hızmetleriniñ emrinen, arbiy naqliyatnı bozmaq maqsadınen “Qırım demir yolu” RK ĞUP reley şkafını yaqıp, terakt yapmağa azırlana edi”, – dep bildirildi.

Şimdi bilgilerge köre, Rusiyeniñ kontrol etkeni Aqmescitniñ Kıyiv rayon makemesi, tutulğan qadınnı eki ayğa apis etti. Onı RF Cinayet qanunnamesiniñ bir qaç maddesine binaen qabaatlaylar: 30-ıncı maddesiniñ 1-inci qısmı, 205-inci maddesiniñ 1-inci qısmı (terakt azırlavı) ve 275-inci maddesi (devlet hainligi).

 Tutulğan qadınnıñ adı ve soyadı belli degil, onıñ açıq izaatları da yoq.