Aqmescit şeerinde sürgünlik fedalarına bağışlanğan hatıra abidesini qaytarıp qoydılar, amma yazısını deñiştirdiler

04 Iyün 2024

_{Foto: Qırım.Aqiqat}

Keçken sene oraq ayında Aqmescit şeerinde alıp çıqarılğan qırımtatar halqınıñ sürgünlik fedalarına bağışlanğan hatıra abidesini qaytarıp qoydılar.

Lenin bulvarında, demiryol vokzalı yanındaki şeer bağçasına deñiştirilgen yazısınen abide qaytarıp qoydılar. Bundan ğayrı, yazısında “qırımtatar” sözünde hata bar, dep crimeantatars.club saytı diqqat celp etti.

Keçken yaz şeer bağçasınıñ rekonstruktsiyası vaqtında hatıra taşını alıp çıqardılar, onı Müftiyatqa berdiler. Olar haber berdiler ki, başqa yerge bu taşnı qoyacaqlar, amma bu sene mayıs ayınıñ 18. künü onıñ yazısını deñiştirip, eski yerge qaytarıp qoydılar, dep Qırım.Aqiqat bildirdi.

Eki taşta: “Bu yerge qırımtatar halqınıñ genotsid fedalarına bağışlanğan abide qoyulacaq” dep yazılğan. Taşnıñ yañı yazısını deñiştirdiler: “2014 senesi çiçek ayınıñ 21. künü RF prezidenti V.V. Putinniñ “Ermeni, bulğar, yunan, italyan, qırım-tatar ve alman halqlarınıñ reabilitatsiya tedbirleri ve olarnıñ uyanuvı ve inkişafını destek etüv aqqında” emri imzalandı”. Aynı zamanda “qırımtatar” sözü sızıçıqnen yazılğan, bu imlâ hatasıdır. Faqat rusiye akimiyeti ve KHV tamam böyle bu sözni yazalar. Abideniñ qoyulması aqqında hatıra yazısı yoq oldı. 

Eñ az 30 sene evel qırımtatar halqınıñ genotsid fedalarına bağışlanğan hatıra taşı qoyulğan.