Menu
HomeMeclis aqqında

Meclis aqqında

Qırımtatar Milliy Meclisi – qırımtatar halqınıñ yekâne vekâletli temsilci-icra organıdır. Meclisniñ Terkibi ve Başı er yañı Qurultaynıñ terkibi tarafından Qurultay delegatları arasında gizli rey berüv vastasınen saylanıla (Qurultay aqqında tafsilâtlıca).

Qırımtatar Milliy Meclisi 1991 senesi Ukraina ve Qırım akimiyeti ögünde ve halqara teşkilâtlarda qırımtatarlarnıñ menfaatlarını temsil etmek içün teşkil etilgen edi.

Öz faaliyetinde Meclis Qurultayğa boysuna, onıñ qararları, Qırımtatar Milliy Meclisi aqqında nizamnamesi, şartnamesi, halqara uquq qaideleri ve Ukraina qanunlarına riayet ete.

Qırımtatar Milliy Meclisi, şu cümleden Meclisniñ reisinen beraber, 33 insandan ibaret.

1991-2014 seneleri Meclisniñ esas maqsadı sovet rejimi tarafından qırımtatarlarğa qarşı yapılğan genotsidniñ aqibetlerini yoq etmek, qırımtatar halqınıñ milliy ve siyasiy aqlarını ğayrıdan tiklemek ve öz milliy toprağında serbest milliy-devlet öz-özüni belgilev aqqını yerine ketirmek edi.

Meclisniñ şimdiki terkibi 2013 senesi orta küz ayında Qurultayda saylandı. Yañı azalarnıñ ve Qırımtatar Milliy Meclisiniñ reisi vazifesine qabul etüv merasimi 2013 senesi boş aynıñ 1-nde Bağçasaraydaki Ha saraynıñ esas meydanında olıp keçti.

Yañı azalarnıñ ve Qırımtatar Milliy Meclisiniñ reisi vazifesine qabul etüv merasimi 2013 senesi boş aynıñ 1-nde Bağçasaraydaki Han-saraynıñ esas meydanında olıp keçti.

2014 senesi Qırım Rusiye tarafından işğal etilgen soñ Meclisniñ reisi Refat Çubarov ve qırımtatar halqınıñ lideri Mustafa Cemilevge yarımadağa kiriş yasaq etildi, soñra Meclisniñ reisiniñ muavinlerine qarşı işğalli akimiyet tarafından cinaiy davalar açıldı, Meclis azaları daimiy basqığa oğradları, temsil organı ise yasaq etildi. Buña cevap olaraq BMniñ Halqara makemesi Rusiyege qırımtatarlarnıñ temsiliy institutlarğa, şu cümleden Mecliske aqqını temin etmege mecbur olğanını bildirdi, lâkin Rusiye bu qararnı körmemezlikke urdı ve bu institutnıñ vekillerine ve umumen qırımtatar halqına qarşı repressiyalarnı devam ettire.

2014 senesinden başlap Qırımtatar Milliy Meclisiniñ reberligi Kıyivde buluna, Qırım ve qırımtatarlarnıñ menfaatlarını milliy ve halqara seviyelerde temsil ete, halqnıñ öz-özüni belgilev aqqını qorçalay, Qırımnıñ işğalden azat etilmesi, Qırım siyasiy mabüsleri ve olarnıñ qorantalarına qoltuta, qırımtatar medeniyetiniñ inkişafı, qırımtatar tiliniñ saqlanuvı ve ilâhre meselelerinen oğraşa.