Kıyivde “Hırsızlanğan ayat: Ervin İbragimovnı qıdıruvnıñ 10 yıllığı” tedbiri olıp keçti

26.05.2026

Mayısnıñ 25-nde Kıyivde qırımtatar faalcisi, Bütündünya qırımtatar kongressiniñ İcra eyyetiniñ azası Ervin İbragimovnıñ hırsızlanmasından on yıl keçkenine bağışlanğan “Hırsızlanğan ayat: Ervin İbragimovnı qıdıruvnıñ 10 yıllığı” tedbiri olıp keçti.

2016 senesi mayısnıñ 24-nde aqşam Ervin İbragimov vaqtınca işğal etilgen Bağçasarayda hırsızlandı. Ondan soñ on yıl keçti, lâkin onıñ taqdiri alâ daa belli degil. Onıñ davası, zemaneviy Qırımda zorbalıqnen ğayıp oluvnıñ eñ yüksek sesli davalarından biri ve işğalli Rusiye akimiyetiniñ qırımtatarlarğa ve işğalge qarşı çıqqan er keske qarşı repressiv siyasetiniñ timsali oldı.

Tedbirni Qırımtatar Milliy Meclisi ve Ukrayina ombudsmanınıñ ofisi teşkil ettiler, ortaqları: Qadın Divanı, CrimeaVOX, CrimeaDaily, QırımMedia ve Qırım evi.

Teşkilâtçılarnıñ qayd etkenlerine köre, tedbirniñ maqsadı sadece Ervin İbragimovnı hatırlamaq ve onıñ qıdıruvını devam ettirmek degil de, Ukrayinanıñ işğal etilgen topraqlarında hırsızlav, zorbalıqnen ğayıp etüv ve siyasiy taqiplerniñ sistematik ameliyatına diqqat çekmektir.

Meclisniñ kommunikatsiya idarecisi ve tedbir teşkilâtçısı Ayşe Umerova açılışta Ervinniñ çoq yıllıq qıdıruvları, qorantasına bağışlanğan fotoresim sergisi ve Kıyiv faalcileri tarafından yıllar devamında keçirilgen birdemlik aktsiyaları aqqında tarif etti:

“O hırsızlanğan soñ bir qaç kün devamında qırımtatar cemiyeti Ervinni qıdıra edi. Bağçasaraydaki er bir erkek tarla, orman, suvlarnı teşkermege başladı. Amma 10 yıl keçti, ve onıñ ne yerde olğanını kimse bilmey”.

Tedbir çerçivesinde 2017 senesi jurnalist Taras İbragimov tarafından çıqarılğan “Ervinsiz bir yıl” vesiqalı videosınıñ taqdimi olıp keçti. Jurnalist Anton Naumlük ve Qırım.Aqiqat leyhasınıñ foto mühbirleri Serğiy Nujnenko ve Alina Smutkonıñ arhiv materiallarından foto sergisi taqdim etildi. Ekspozitsiya Ervin qorantasınıñ hırsızlanuv, qıdıruv, Bağçasaraydaki kollektiv duaları, Kıyivdeki birdemlik aktsiyaları ve Qırımdaki diger hırsızlav davalarını aydınlattı. Sergide Ervinge bağışlanğan qırımtatar müellifi Aziza Eskenderniñ resmi ve Ervinniñ uzun hastalıqtan soñ bu sene saban ayında vefat etken anası Leyla İbragimovağa bağışlanğan şiiriy metin (ukrayin tilinde) taqdim etildi. 

І сьогодні, і вчора, і завтра кожен раз 

Коли після важкої темної ночі я зустрічаю світанок надії,

Я чую її голос.

Я не можу забути цей шепіт.

Я не можу залишити її пошук.

Я не можу спинити боротьби. 

Задля збереження життя мелодії,

Яка може змінити наш всесвіт.

Задля збереження материнської любові,

Що бʼється птахом  в моєму серці 

До останньої миті 

Я буду боротися за тебе, 

Ервіне!

Qırımtatar tiline tercimesi:

Em bugün, em dün, em de
Zor qara geceden ümüt tañını qarşılağan er zaman,
Men onıñ sesini duyam.
Men bu fısıltı unutamam.
Onı qıdırmaqtan vazgeçemem.
Men küreşmege toqtayamam.
Dünyamıznı deñiştire bilecek
Ayat nağmesini saqlamaq içün.
Qalbimde saqlap qalğan
Ana sevgisini saqlamaq içün
Soñ anıma qadar
Seniñ içün küreşecegim,
Ervin! 

Tedbirniñ esas qısmı, “Cevapsız 10 yıl: Ervin İbragimovnıñ davası ve işğalde zorbalıqnen ğayıp oluv sisteması” adlı panel munaqaşası oldı. İştirakçiler Rusiye Federatsiyasınıñ qırımtatarlarğa nisbeten repressiv siyaseti, basqı ve qorquzuv aleti olaraq alıp qaçuv, ğayıp olğanlarnıñ qorantalarınen iş, cinayetlerni taqiq etüv ve vesiqalaştıruv mehanizmleri, em de Rusiyeni mesüliyetke çekmek içün halqara mehanizmlerni muzakere ettiler.

Munaqaşalarda Qırımtatar Milliy Meclisiniñ reisi Refat Çubarov, Ukrayina halq mebusı Tamilla Taşeva, Qırımtatar resurs merkeziniñ idarecisi Zarema Bariyeva, Ukrayina ombudsmanınıñ temsilcisi Stanislav Kuliş ve Qırım Muhtar Cumhuriyeti prokurorlığınıñ temsilcisi Vitaliy Sekretar iştirak ettiler.

Refat Çubarov çıqışta bulunıp, Qırımda insanlarnıñ zorbalıqnen ğayıp oluvı Rusiyeniñ qırımtatarlarnı qorqutmaq ve olarnıñ iradesini bastırmaq içün alıp barğan siyaseti olğanını qayd etti. O şunı da qayd etti ki, Ervin İbragimovnıñ hırsızlanmasında qabaatlı olğanlar Qırım işğalden azat etilecek ve tahqiqatqa işğalli akimiyetniñ tesiri yoq etilecek soñ mesüliyetke çekilmeli.

“Ervin ne içün böylege oğraşqanını sorasalar, men aytam ki, o, Bağçasaray cemiyetiniñ yetekçilerinden biri edi, o pek körümli edi, bölge meclisiniñ azası edi, işğalden evel şeer şurasınıñ mebusı edi, 2015 senesi ise Bütündünya qırımtatar kongressiniñ İcra eyyetiniñ azası olaraq saylandı. Yani Ervinge er angi taraftan baqsañız, o, çoq insan içün kerek ve müim olğan işni yapıp olğan bir adam edi. O, beraber çalışqan insanlar arasında itibarlı edi. Onıñ içün Ervinniñ hırsızlanması yalıñız bir insannı qabaatlamaq degil edi – bu, “Tur, toqta! Ervinniñ başına neler kelgenine baq” dep ayta bilecek ana-babası olğan qırımtatar gençlerine tesir etmek ıntıluvı edi. FSB böyle çalışa”, – dep ayttı Refat Çubarov.

Bir qaç yıl devamında Qırımdaki vaqialarnı aydınlatqanı, şimdi ise arbiy mühbir olğan jurnalist Taras İbragimov tedbirni alıp bardı. Munaqaşa vaqtında Darya Hrişçenkovanıñ çıqışı ayrı bir ses oldı, onıñ babası 2025 senesi mayıs ayında FSB temsilcileri tarafından Aqyarda hırsızlanğan edi.

Tedbirni qırımtatar halqınıñ lideri Mustafa Cemilev, Meclis azaları Ahtem Çiygöz, İlmi Umerov, Eskender Bariyev, Riza Şevkiyev ve Gülnara Bekirova, em de cemaat vekilleri, faalciler ve jurnalistler ziyaret ettiler.

Tedbir devamında iştirakçiler Ervin İbragimovnıñ davası tek onıñ qorantasınıñ şahsiy faciası degil de, işğal etilgen Qırımda sistemalı repressiyalar ve cezasızlıq timsali olğanını qayd ettiler. Teşkilâtçılar qaçırılğanlarnı qıdıruv işini devam ettirmek, ğayıp olğanlarnıñ qorantalarına qoltutmaq ve Ukraina işğal etilgen topraqlarında zorbalıqnen ğayıp olğanlarnıñ halqara imayesini yapmaq müim olğanını qayd ettiler.