Aqmescitte Şamil Alâdinniñ şerefine hatıra tahtası qoyuldı

12 Iyül 2012

Aqmescit şeeri Jukovskiy soqağında belli qırımtatar yazıcısı ve cemaat erbabı ŞamiL Alâdin yaşağan ve icat etken 20-nci evde 2012 senesi iyül 12 künü onıñ şerefine hatıra tahtasını qoyuv merasimi keçirildi. Tedbir Şamil Alâdin doğğanınıñ 100 yıllığına bağışlanğan tedbirlerniñ birincisidir.

Hatıra tahtasınıñ açılış merasiminde Şamil Alâdinniñ qızı Leylâ ailesinen, Qırımtatar halqı Meclisiniñ azaları, Qırım Milletlerara munasebetler ve sürgün etilgen grajdanlarnıñ işleri boyunca komitet reisi Edem Dudakov, Qırım Yuqarı Şurasınıñ vekilleri, “Qrım” fondı” hayriye teşkilâtınıñ baş müdiri Riza Şevkiyev, Kebir caminiñ imamı Niyazi Ramazanov, Amerikadan Qırımğa kelgen belli qırımtatar aktrisası Ayşe Dittanova, bunıñ kibi de qırımtatar cemaatçılığınıñ vekilleri iştirak ettiler.

Meclisniñ Maarif ve medeniyet idaresiniñ başı Safure Kacametova Şamil Alâdinniñ ailesi, aqrabaları ve tedbir iştirakçilerini büyük qırımtatar yazıcısı yaşağan evde hatıra tahtasınıñ qoyulmasınen samimiy tebrik etti. “Şamil Alâdin öz halqı içün yaptıqlarını unutmağa aqqımız yoqtır”, – dedi Safure Kacametova.

Safure Kacametova hatıra tahtasını qoyuv işine isse qoşqan, babasınıñ fondını qurıp, oña reislik yapqan Leylâ Alâdinge de büyük teşekkürlerini bildirdi.

Öz nevbetinde Qırım Yuqarı Şurası daimiy komissiyasınıñ reisi Sergey Tsekov da bu tedbirge davet etilgeni içün minnetdarlıq bildirip, Qırım sakinleri yalıñız öz tillerinde yazılğan eserlerni degil de, diger tillerde yaratılğan edebiyatnı da bilmek kerekler, dedi. Şamil Alâdin tek qırımtatar halqınıñ degil de, bütün dünya edibidir, dep qayd etti Tsekov.

“Biz hatıra tahtasını açamız, amma böyle bir insannıñ hatırasını edebiyleştirmek içün bu pek az. Şamil Alâdin kibi insanlar içün daa çoq şey yapmalımız”, – dedi Tsekov.

Hatıra tahtası açılışı merasiminde çıqışta bulunğanlarnıñ episi Şamil Alâdinniñ yazıcılıq faaliyetine qoşqan salmaqlı issesini ayrıca qayd ettiler.
Belli ki, 1934 senesinden 1944 senesine qadar o, Qırım yazıcılar birligine yolbaşçılıq yaptı ve o devirde bir sıra yañı mecmua ve gazetalar açıldı.

“O zamanki akimiyet hadimleri yazıcılar insan qalbiniñ müendisi olğanını pek yahşı añlay ediler”, – dedi filologiya ilimleri doktorı Vladimir Kazarin.